گرفتار ہونے والوں میں حیدر عباس، اقتدار حسین، حسن علی، علی بخش، ثناء اللہ، محمد ادریس اور عرفان احمد شامل
ملتان (ملک جابر عباس سے)
ملتان: ایف آئی اے امیگریشن ملتان نے بڑی کارروائی کرتے ہوئے غیر قانونی طور پر بارڈر پار کرکے بیرونِ ملک جانے والے 7 مسافروں کو گرفتار کر لیا۔
ایف آئی اے حکام کے مطابق گرفتار مسافروں کو غیر قانونی قیام اور بارڈر پار کرنے کے الزامات پر ملائیشیا، عراق اور دیگر ممالک سے ڈیپورٹ کیا گیا تھا۔ تمام مسافر فلائٹ نمبر G9558 کے ذریعے ملتان ایئرپورٹ پہنچے تھے۔
گرفتار ہونے والوں میں حیدر عباس، اقتدار حسین، حسن علی، علی بخش، ثناء اللہ، محمد ادریس اور عرفان احمد شامل ہیں، جن کا تعلق ملتان، کرم اور دیگر مختلف علاقوں سے بتایا گیا ہے۔
امیگریشن کلیئرنس کے دوران گرفتار مسافروں کے بیرونِ ملک روانگی سے متعلق کسی قسم کا سفری ریکارڈ سسٹم میں موجود نہیں تھا۔ ابتدائی تفتیش کے مطابق مسافر غیر قانونی طریقے سے بارڈر پار کرکے بیرونِ ملک گئے تھے۔
ایف آئی اے کے مطابق ایجنٹوں نے مسافروں کو ملازمت کا جھانسہ دے کر غیر قانونی طریقے سے بیرونِ ملک بھجوانے کا انتظام کیا۔ معاملہ مزید تحقیقات اور ٹریول ایجنٹوں سمیت غیر قانونی ہجرت میں سہولت کاری کرنے والے نیٹ ورک کا سراغ لگانے کے لیے اینٹی ہیومن ٹریفکنگ سرکل ملتان کو بھجوا دیا گیا ہے۔
ایف آئی اے نے غیر قانونی ہجرت اور انسانی اسمگلنگ میں ملوث عناصر کے خلاف کارروائیاں جاری رکھنے کے عزم کا اظہار کرتے ہوئے کہا ہے کہ غیر قانونی طریقوں سے بیرونِ ملک جانے والے افراد اور ان کے سہولت کاروں کے خلاف قانون کے مطابق کارروائی عمل میں لائی جائے گی۔