اسلام آباد: اقوام متحدہ میں پاکستان کے مستقل مندوب سفیر عاصم افتخار احمد نئے سیکرٹری خارجہ مقرر کر دیے گئے۔ موجودہ سیکرٹری خارجہ آمنہ بلوچ 17 ستمبر کو ریٹائر ہوں گی اور بعد ازاں ترکیہ میں پاکستان کی سفیر کی ذمہ داریاں سنبھالیں گی، جبکہ تقرریوں کی وزیراعظم شہباز شریف نے منظوری دے دی ہے۔
ایکس پر اپنے پیغام میں نائب وزیراعظم و وزیر خارجہ محمد اسحاق ڈار نے اقوام متحدہ میں پاکستان کے مستقل مندوب سفیر عاصم افتخار احمد کے بطور نئے سیکرٹری خارجہ تعیناتی کااعلان کیا۔
The 33rd Foreign Secretary of Pakistan, Ambassador Amna Baloch, after a distinguished career spanning over three decades and her tenure as Foreign Secretary since 11 September 2024, will retire from government service on 17 September 2026. I commend her dedicated service and…
— Ishaq Dar (@MIshaqDar50) September 9, 2026
محمد اسحاق ڈار نے کہا کہ موجودہ سیکرٹری خارجہ سفیر آمنہ بلوچ 17 ستمبر 2026 کو تین دہائیوں سے زائد عرصے پر محیط شاندار سفارتی و سرکاری خدمات کے بعد ریٹائر ہوجائیں گی۔ انہوں نے آمنہ بلوچ کی وزارت خارجہ کی قیادت اور خدمات کو سراہتے ہوئے نیک خواہشات کا اظہار کیا۔
انہوں نے بتایا کہ ریٹائرمنٹ کے بعد آمنہ بلوچ ترکیہ میں پاکستان کی سفیر کی حیثیت سے ذمہ داریاں سنبھالیں گی۔
اسحاق ڈار نے کہا کہ مجھے یقین ہے کہ سفیر عاصم افتخارکی قیادت میں دفتر خارجہ، سفیر آمنہ بلوچ اور ان کے تمام پیشروؤں کی جانب سے کیے گئے اہم کام کو آگے بڑھاتے ہوئے، واضح حکمتِ عملی، پیشہ ورانہ انداز اور بھرپور عزم کے ساتھ پاکستان کے مفادات کو آگے بڑھاتا رہے گا۔نائب وزیراعظم نے بتایا کہ وزیراعظم شہباز شریف نے نئی تعیناتیوں کی منظوری دے دی ہے۔