سیالکوٹ۔سلیم احمد اعوان شیخو
بدعنوانیوں اور رشوت لینے کے الزامات میں محکمہ سوشل ویلفیئر سیالکوٹ کے ڈپٹی ڈائریکٹر کو گرفتار کر لیا گیا۔بتایا گیا ہے محکمہ سوشل ویلفیئر سیالکوٹ میں تعینات ڈپٹی ڈائریکٹر محمد شریف گھمن پر عرصہ دراز سے بدعنوانیوں اور رشوت لینے کے الزامات لگ رہے تھے تو ان الزامات کی روشنی میں محکمہ اینٹی کرپشن اسٹیبلشمنٹ سیالکوٹ کے قائم مقام سرکل آفیسر رانا مبشر علی نے جوڈیشل مجسٹریٹ کے ہمراہ ٹریپ ریڈ کر کے مذکورہ ڈپٹی ڈائریکٹر کو گرفتار کر کے اس کے خلاف محکمہ اینٹی کرپشن اسٹیبلشمنٹ سیالکوٹ کے تھانہ میں مقدمہ درج کر کے تفتیش شروع کر دی ہے۔
یہاں یہ امر قابل ذکر ہے کہ جس نے مذکورہ ڈپٹی ڈائریکٹر کو گرفتار کروانے میں اہم کردار ادا کیا ہے وہ بھی محکمہ سوشل ویلفیئر کا ملازم ہے اس کی محکمہ سے مسلسل غیر حاضری پر اس کا تبادلہ کر دیا گیا تھا۔جس کا اس کو رنج تھا اور اس نے ٹریپ ریڈ کرواکر ڈپٹی ڈائریکٹر کو گرفتار کروا دیا۔