"18 امریکی فوجیوں کی ہلاکتیں چھوٹاموٹا معاملہ!” صدرڈونلڈ ٹرمپ کے بیان پر ملک بھر میں ہنگامہ، شدید تنقید

    واشنگٹن ڈی سی:امریکی صدر ڈونلڈ ٹرمپ کی جانب سے ایران جنگ میں جاں بحق ہونے والے فوجیوں کے متعلق انتہائی متنازعہ بیان پر ملک بھر میں ہنگامہ برپا ہوگیا۔ مڈٹرم الیکشن سے عین پہلے یہ بیان سیاسی طوفان کا سبب بن گیا ہے۔
    صدر ٹرمپ نے ایران کے خلاف جاری جنگ کو "چھوٹا موٹا معاملہ” (Small Potatoes) قرار دیتے ہوئے اس میں ہونے والی فوجی ہلاکتوں کی اہمیت کو سرے سے مسترد کر دیا ہے، جس پر قانون سازوں، سابق فوجی اہلکاروں اور ناقدین کی طرف سے شدید مذمت کی جا رہی ہے۔


    رپورٹ کے مطابق وائٹ ہاؤس کے اوول آفس میں اے بی سی نیوز کی معروف صحافی ریچل اسکاٹ (Rachel Scott) نے نائب صدر جے ڈی وینس کے اس دعوے کے بارے میں پوچھا کہ ایران کے ساتھ کشیدگی کوئی باقاعدہ جنگ نہیں ہے، تو صدر ٹرمپ نے جواب دیا کہ "بہت سے لوگ اسے جنگ نہیں کہتے، میں اسے ایک فوجی تنازع کہتا ہوں کیونکہ یہ ہمارے لیے چھوٹا موٹا معاملہ ہے، کوئی بڑی بات نہیں۔ ہم نے وینزویلا کیا، اور ہم نے یہ کیا۔ وینزویلا میں ہمارا کوئی جانی نقصان نہیں ہوا، اور اس میں ہمارے 18 افراد جاں بحق ہوئے ہیں۔ ویتنام میں آپ نے ایک لاکھ لوگ کھوئے تھے، اور دیگر جنگوں میں ہزاروں لوگ مارے گئے تھے۔”


    صحافی ریچل اسکاٹ نے فوراً ٹرمپ کو ٹوکتے ہوئے یاد دلایا کہ اس تنازع میں اب تک 18 امریکی فوجی اپنی جانیں گنوا چکے ہیں، جس پر صحافی نے کہا، "مسٹر پریذیڈنٹ! جن 18 افراد کی موت ہو چکی ہے، ان کے لواحقین کے لیے یہ ہرگز چھوٹا موٹا معاملہ نہیں ہے۔”


    تاہم ٹرمپ نے اپنے بیان کا دفاع کرتے ہوئے ویتنام کی جنگ کا موازنہ چھیڑ دیا اور صحافی سے سوال کیا کہ کیا وہ جانتی ہیں کہ ویتنام کی جنگ کتنی طویل تھی؟ ٹرمپ نے کہا، "ہمیں اس جنگ میں ابھی صرف پانچ ماہ ہوئے ہیں، اور کیا آپ جانتی ہیں کہ ہم نے ان پانچ مہینوں میں کیا کیا ہے؟ ایران کے پاس اب جوہری ہتھیار نہیں ہو گا، کیونکہ اگر ایسا ہوتا تو شاید آپ یہاں زیادہ دیر کھڑی نہ ہوتیں۔”


    واضح رہے کہ فروری کے اواخر میں امریکہ اور اسرائیل کی جانب سے ایران کے خلاف جنگ کے آغاز سے لے کر اب تک مجموعی طور پر 18 امریکی فوجی ہلاک اور 750 سے زائد زخمی ہو چکے ہیں۔ ڈیموکریٹک قانون سازوں اور بالخصوص فوج سے تعلق رکھنے والے ارکانِ پارلیمنٹ نے اس بات پر شدید برہمی کا اظہار کیا ہے کہ ملک کے سپریم کمانڈر کی جانب سے فرائض کی ادائیگی میں جان کی بازی ہارنے والے جوانوں کی قربانیوں کو اس طرح ہلکا لینا انتہائی شرمناک اور فوج کے ساتھ سراسر غداری کے مترادف ہے۔

    Related Posts