ہندوستان اور جاپان کے سفارتی تعلقات کی 75ویں سالگرہ کے موقع پر دونوں ملکوں کی مردوں کی ٹیمیں 22 ستمبر کو جاپان میں تاریخی ٹی-20 انٹرنیشنل میچ کھیلیں گی
ٹوکیو: ہندوستان اور جاپان کے درمیان سفارتی تعلقات کے قیام کی 75ویں سالگرہ کی تقریبات کے آغاز کے موقع پر ٹیم انڈیا جاپان کا دورہ کرے گی، جہاں دونوں ملکوں کی مردوں کی ٹیموں کے درمیان خصوصی ٹی-20 انٹرنیشنل میچ کھیلا جائے گا۔ ہندوستانی کرکٹ کنٹرول بورڈ (بی سی سی آئی) اور جاپان کرکٹ ایسوسی ایشن (جے سی اے) نے اس تاریخی مقابلے کا اعلان کیا ہے۔
بی سی سی آئی کی جانب سے جاری پریس ریلیز کے مطابق ’سوزوکی کپ‘ 22 ستمبر 2026، بروز منگل، جاپان کے توچیگی پریفیکچر میں واقع سانو انٹرنیشنل کرکٹ گراؤنڈ میں منعقد ہوگا۔ یہ مقابلہ دونوں ملکوں کے درمیان کھیل کے ذریعے باہمی روابط اور تعاون کو فروغ دینے کی ایک اہم کوشش قرار دیا جا رہا ہے۔
پریس ریلیز میں کہا گیا ہے کہ یہ مقابلہ ’اسپورٹ 75‘ پہل کا پہلا قدم ہوگا۔ اس پہل کا مقصد کھیل کے شعبے میں ہندوستان اور جاپان کے درمیان عوامی سطح پر باہمی تبادلے اور تعاون کو فروغ دینا ہے۔ یہ اقدام دونوں ملکوں کے وزرائے اعظم کے درمیان ہونے والی ایک ملاقات میں طے پانے والے معاہدے کے تحت شروع کیا گیا ہے۔
بی سی سی آئی کے سکریٹری دیوجیت سائکیا نے اس موقع پر خوشی کا اظہار کرتے ہوئے کہا کہ بورڈ اس تاریخی موقع کا حصہ بننے پر خوش ہے۔ ان کے مطابق ہندوستان اور جاپان کی مردوں کی ٹیموں کا جاپان میں خصوصی ٹی20 انٹرنیشنل کے لیے ایک ساتھ آنا کرکٹ کے لیے ایک اہم لمحہ ہے، کیونکہ اس کے ذریعے ٹیم انڈیا ایک ایسے ملک کا رخ کرے گی جہاں اس کھیل کی مقبولیت ابھی فروغ پا رہی ہے۔
سائکیا نے کہا کہ یہ مقابلہ دونوں ملکوں کے درمیان کھیل کے ذریعے تعلقات کو مزید مضبوط بنانے اور کرکٹ کو نئی جگہوں تک پہنچانے میں اہم کردار ادا کرے گا۔
دوسری جانب جاپان کرکٹ ایسوسی ایشن کے چیف ایگزیکٹو افسر ناؤکی میازاکی نے ہندوستانی ٹیم کی میزبانی کو ایسوسی ایشن کے لیے تاریخی موقع قرار دیا۔ انہوں نے کہا کہ موجودہ عالمی چیمپئن ٹیم کو جاپان میں کرکٹ کھیلنے کے لیے مدعو کرنا جاپانی کرکٹ کے لیے ایک غیر معمولی لمحہ ہے۔
انہوں نے کہا کہ جاپان کرکٹ ایسوسی ایشن ہندوستانی کرکٹ شائقین کے جوش و جذبے کا خیرمقدم کرنے کے لیے پُرجوش ہے۔ ساتھ ہی انہوں نے کرکٹ میں دلچسپی رکھنے والے مقامی جاپانی شائقین سے بھی اپیل کی کہ وہ اس تاریخی مقابلے کو دیکھنے کے لیے میدان کا رخ کریں اور اپنی قومی ٹیم کی حوصلہ افزائی کریں۔
یہ میچ ہندوستان اور جاپان کے درمیان سفارتی تعلقات کی 75ویں سالگرہ کی تقریبات میں کھیل کے کردار کو نمایاں کرے گا اور جاپان میں کرکٹ کو مزید مقبول بنانے کی کوششوں کو بھی تقویت دے سکتا ہے۔