سیالکوٹ ۔سلیم احمد اعوان شیخو
۔سیالکوٹ کینٹ میں واپڈا گیپکو کے ملازم ذیشان مسیح عرف شیرو کو رشوت لیتے ہوئے فیڈرل انویسٹیگیشن ایجنسی کی ٹیم نے گرفتار کر لیا ہے۔بتایا گیا ہے کہ واپڈا گیپکو سیالکوٹ کینٹ میں تعینات ملازم ذیشان مسیح پر الزام ہے کہ وہ بجلی کے معاملات میں اختیارات کا ناجائز استعمال کرتے ہوئے عرصہ دراز سے شہریوں کو مشکلات میں مبتلا کر رہا تھا جبکہ اس نے اپنے قریبی رشتہ داروں کے گھروں کو بجلی فراہم کرنے کے لئے ہمسایوں کے میٹروں سے تاریں لگوا رکھی تھیں جس کے باعث دیگر صارفین کو بجلی کے اضافی بوجھ کا سامنا کرنا پڑ رہا تھا۔ معلوم ہوا ہے کہ مذکورہ ملازم ایک شہری سے اس کے واپڈا گیپکو سے متعلق کام کے سلسلہ میں رشوت وصول کر رہا تھا کہ فیڈرل انویسٹیگیشن ایجنسی کی ٹیم نے مذکورہ ملازم کو شہری سے رشوت وصول کرتے ہوئے رنگ ہاتھوں گرفتار کر لیا۔فیڈرل انویسٹیگیشن ایجنسی نے گرفتار ملازم کے خلاف مقدمہ درج کر کے تفتیش شروع کر دی ہے۔