ایرانی صدر سے ملاقات’انتہائی مثبت اور نتیجہ خیز‘ رہی ، وفاقی وزیر د اخلہ محسن نقوی، آبنائے ہرمز کو دوبارہ کھولنے پر بھی بات چیت
اسلام آباد / تہران:چیف آف ڈیفنس فورسز فیلڈ مارشل سید عاصم منیر نے ایران کا ایک روزہ اہم دورہ کامیابی کے ساتھ مکمل کر لیا ہے۔ پاکستان کے سرکاری میڈیا اور پاک فوج کے شعبہ تعلقات عامہ (آئی ایس پی آر) کے مطابق، یہ دورہ ان سفارتی کوششوں کا حصہ ہے جن کا بنیادی مقصد امریکا اور ایران کے درمیان جاری تناؤ کو کم کرنا، خطے میں جاری بدامنی کا مستقل خاتمہ اور امن کے راستے تلاش کرنا ہے۔
دورے کے دوران فیلڈ مارشل عاصم منیر نے تہران میں اعلیٰ ایرانی قیادت سے ملاقاتیں کیں، جن میں ایران کے صدر ڈاکٹر مسعود پزشکیان، سپریم لیڈر کے نمائندہ برائے سپریم نیشنل سکیورٹی کونسل محسن رضائی، پارلیمان کے سپیکر محمد باقر قالیباف، وزیر خارجہ عباس عراقچی اور وزیر داخلہ اسکندر مومنی کے ساتھ تفصیلی مذاکرات شامل ہیں۔
ایرانی صدر کے ساتھ ہونے والی ملاقات کو سراہتے ہوئے وفاقی وزیر داخلہ محسن نقوی نے اپنے ایک ایکس (ٹوئٹر) بیان میں اسے ’انتہائی مثبت اور نتیجہ خیز‘ قرار دیا ہے۔ منگل کو علی الصبح کی گئی اس پوسٹ میں انہوں نے بتایا کہ بات چیت کے دوران ایران امریکا تنازع، مشرق وسطیٰ کی کشیدگی اور آگے بڑھنے کے لائحہ عمل پر کھل کر تبادلہ خیال کیا گیا۔ انہوں نے مزید کہا کہ مفاہمتی یادداشت کی بحالی کے لیے دونوں اطراف سے ضروری اقدامات پر بھی بات ہوئی تاکہ اس تنازع کا ایک جامع حل نکالا جا سکے۔
Field Marshal Syed Asim Munir and I had a very positive and productive meeting with the President of Iran. Our discussion focused on the Iran US conflict, tensions in the Middle East and the way forward, as well as the steps needed by both sides for restoration of the Islamabad… https://t.co/jt1wtlESCa
— Mohsin Naqvi (@MohsinnaqviC42) August 24, 2026
محسن نقوی کے مطابق، ایرانی صدر نے اپنی حکومت کا مؤقف اور خدشات پوری صراحت کے ساتھ بیان کیے، جن پر تعمیری انداز میں گفت و شنید کی گئی۔ اس اعلیٰ سطحی ملاقات کا اختتام انتہائی خوشگوار ماحول میں ہوا، اور یہ توقع ظاہر کی گئی ہے کہ ان اقدامات سے خطے میں پائیدار امن کی راہ ہموار ہوگی۔
ریڈیو پاکستان کے مطابق، ان ملاقاتوں میں کشیدگی کو مزید بڑھنے سے روکنے، اہم آبی گزرگاہ آبنائے ہرمز کو دوبارہ کھولنے اور تمام تر اختلافات کو جنگ یا محاذ آرائی کی بجائے صرف اور صرف مذاکرات کے ذریعے حل کرنے کے طریقوں پر تفصیلی غور کیا گیا۔ ایران کی اعلیٰ قیادت نے اس موقع پر خطے میں امن کے قیام کے لیے پاکستان کے مثبت اور مخلصانہ سفارتی کردار کی بھرپور تعریف کی اور اس عزم کا اعادہ کیا کہ باہمی تعاون سے خطے کو مزید بحرانوں سے بچایا جا سکتا ہے