وزیراعلیٰ مریم نواز شریف کی زیر صدارت اہم اجلاس، تین شفٹوں میں کام کرنے کا حکم ، بروقت تکمیل کی سخت ہدایات
لاہور:وزیراعلیٰ پنجاب مریم نواز شریف نے صوبے کے بڑے شہروں میں سفری سہولیات کو انقلابی رخ دینے کے عزم کا اعادہ کرتے ہوئے گوجرانوالہ یلو لائن ماس ٹرانزٹ پراجیکٹ کی تکمیل کے لیے مارچ 2027 کی حتمی ڈیڈ لائن مقرر کر دی ہے۔ انہوں نے واضح کیا ہے کہ منصوبوں کی ٹائم لائن کو کسی صورت آگے نہیں بڑھایا جانا چاہیے اور شہریوں کو مزید زحمت سے بچانے کے لیے دن رات کام جاری رکھا جائے۔
وزیراعلیٰ مریم نواز شریف کی زیر صدارت گوجرانوالہ اور فیصل آباد ماس ٹرانزٹ سسٹمز سے متعلق ایک خصوصی اجلاس منعقد ہوا، جہاں دونوں پراجیکٹس پر ہونے والی پیشرفت کا ڈرون فوٹیج کے ذریعے باریک بینی سے جائزہ لیا گیا۔ اجلاس میں بریفنگ دی گئی کہ کام کی رفتار کو تیز کرنے کے لیے تین شفٹوں میں عملہ تعینات کیا جائے گا۔
بریفنگ کے دوران بتایا گیا کہ 31.5 کلومیٹر طویل گوجرانوالہ یلو لائن منصوبے پر ایک تہائی سے زائد کام تکمیل کے قریب ہے۔ اس فلیگ شپ پراجیکٹ کے اہم خدوخال درج ذیل ہیں:
For the first time ever, Gujranwala is getting its own state-of-the-art Mass Transit System. Alhamdulillah, work is progressing at full pace to transform urban mobility and provide citizens with modern, efficient, and comfortable public transport.
Project Progress:
🔹Metro… pic.twitter.com/4Tj9QbJ888
— Maryam Nawaz Sharif (@MaryamNSharif) June 29, 2026
منصوبے میں کل 25 جدید اسٹیشن بنائے جائیں گے جن میں سے 2 انڈر گراؤنڈ ہوں گے۔
ٹریفک کی روانی کو یقینی بنانے کے لیے 12 انڈر پاسز، 35 کلومیٹر طویل سروس لائن اور سگنل فری یو ٹرن تعمیر کیے جا رہے ہیں۔
یوٹیلیٹی سروسز کی منتقلی کے تحت 1233 پولز اور 552 ٹرانسفارمرز منتقل کیے جا چکے ہیں، جبکہ 15 ہزار فٹ سیوریج، 12 ہزار فٹ واٹر سپلائی اور 11 ہزار فٹ گیس پائپ لائن بھی بچھائی جائے گی۔
اس کے علاوہ گوجرانوالہ ماس ٹرانزٹ کے لیے 62 کلومیٹر طویل ڈرین کی تعمیر کا 40 فیصد کام بھی مکمل ہو چکا ہے۔
اجلاس میں فیصل آباد ماس ٹرانزٹ سسٹم پر بھی پیشرفت کا جائزہ لیا گیا۔ 20.3 کلومیٹر طویل اس منصوبے میں 11.1 کلومیٹر طویل اوور ہیڈ پل (بریجز) تعمیر کیے جائیں گے، جبکہ اس کے تحت 15 کلومیٹر سوئی گیس لائن اور 12 بس اسٹاپس بنائے جا رہے ہیں۔
وزیراعلیٰ مریم نواز شریف کی سخت ہدایات کے پیش نظر ترقیاتی کاموں کے دوران ماحولیات کا خاص خیال رکھا جا رہا ہے۔ منصوبوں کی زد میں آنے والے درختوں کو ضائع کرنے کے بجائے فیصل آباد اور گوجرانوالہ ماس ٹرانزٹ سسٹمز میں تقریباً 5 ہزار درختوں کی کامیابی سے ری پلانٹیشن کی گئی ہے، جو کہ ایک تاریخی ریکارڈ ہے۔
وزیراعلیٰ نے دوٹوک الفاظ میں کہا کہ عوام کو اس دوران ہونے والی مشکلات کا بخوبی احساس ہے، اس لیے تمام متعلقہ محکمے دن رات محنت کر کے مقررہ مدت کے اندر ان میگا پراجیکٹس کو پایہ تکمیل تک پہنچائیں۔