سیالکوٹ(سلیم احمد اعوان شیخو)
ڈسٹرکٹ اکاؤنٹس آفس سیالکوٹ خود مسائل کا شکار ہے اس دفتر میں کچرا، جھاڑیاں اور بارش کا پانی انتظامی غفلت کی تصویر بن چکے ہیں سیالکوٹ بھر کے مختلف سرکاری محکموں کے ملازمین کو تنخواہوں اور فنڈز کے اجرا میں اہم کردار ادا کرنے والا ڈسٹرکٹ اکاؤنٹس آفس سیالکوٹ خود بنیادی سہولیات اور صفائی کے مسائل کا شکار ہو گیا۔ دفتر کے احاطے کی صورتحال نے سرکاری ادارے کی دیکھ بھال کے حوالے سے کئی سوالات اٹھا دیئے۔
بارش کے بعد دفتر کے صحن میں پانی جمع ہونے، نکاسیٔ آب کے ناقص انتظامات، جگہ جگہ کیچڑ اور خستہ حال فرش کے باعث دفتر آنے والے سائلین اور ملازمین کو مشکلات کا سامنا کرنا پڑتا ہے۔ دوسری جانب احاطے میں صفائی کے ناقص انتظامات کے باعث کچرے کے ڈھیر، خود رو گھاس اور جھاڑیوں نے جگہ بنا لی ہے۔ جس سے مجموعی ماحول بھی ناگفتہ بہ دکھائی دیتا ہے۔ ڈسٹرکٹ اکاؤنٹس آفس کے احاطے میں پھیلی خود رو جھاڑیوں، گھاس، کچرے اور خستہ حال راستوں کی صورتحال واضح طور پر دیکھی جا سکتی ہے۔ بارش کے پانی اور گندگی کے باعث دفتر آنے والے شہریوں کو آمدورفت میں بھی دشواری کا سامنا رہتا ہے۔سائلین کا کہنا ہے کہ سرکاری امور کے سلسلے میں روزانہ بڑی تعداد میں شہری اور سرکاری ملازمین اکاؤنٹس آفس آتے ہیں، اس لئے دفتر کے ماحول اور بنیادی سہولیات پر خصوصی توجہ دی جانی چاہیئے۔ انہوں نے مطالبہ کیا کہ بارش کے پانی کی نکاسی، صفائی ستھرائی، کچرے کی صفائی اور خود رو جھاڑیوں کی تلفی کے لیے فوری اقدامات کئے جائیں۔ڈسٹرکٹ اکاؤنٹ آفیسر نعمان گوندل سے رابطہ کیا گیا تو انہوں نے بتایا کہ دفتر کے مسائل کے حوالے سے اکاوئنٹنٹ جنرل آفس کو متعدد مرتبہ درخواستیں کی جا چکی ہیںتاہم تاحال مطلوبہ فنڈز فراہم نہیں کیے گئے۔ ان کے مطابق فنڈز دستیاب ہونے پر دفتر میں ضروری مرمت اور دیگر مسائل کے حل کے لیے اقدامات کیے جائیں گے۔سائلین نے اعلیٰ حکام سے مطالبہ کیا ہے کہ ڈسٹرکٹ اکاؤنٹس آفس سیالکوٹ کی صورتحال کا فوری نوٹس لیتے ہوئے ضروری فنڈز فراہم کیے جائیں اور دفتر میں صفائی، نکاسیٔ آب اور بنیادی سہولیات کی بہتری کے لیے عملی اقدامات کیے جائیں تاکہ سرکاری امور کے لیے آنے والے شہریوں اور ملازمین کو بہتر ماحول میسر آ سکے۔
