نواب شاہ ( رپورٹ نفیس آرائیں)
خیر شاہ اسٹاپ کے رہائشی مزدور خادم حسین سولنگی نے الزام عائد کیا ہے کہ دو ماہ قبل قاضی احمد روڈ پر لال قلعہ شادی ہال کے قریب تین مسلح نامعلوم ڈاکو اسلحے کے زور پر اس کی ماڈل 2026 موٹر سائیکل (چیچس نمبر HB-642301) اور 61 ہزار روپے چھین کر فرار ہوگئے۔ متاثرہ شہری کے مطابق واقعے کی این سی تھانہ تعلقہ میں درج کرائی گئی، تاہم دو ماہ گزرنے کے باوجود پولیس کی جانب سے نہ ملزمان گرفتار کیے گئے اور نہ ہی مسروقہ سامان برآمد ہوسکا۔
خادم حسین سولنگی نے بتایا کہ وہ کیلے کا مزدور ہے اور مزدوروں کی اجرت کی رقم لے کر جا رہا تھا۔ اس کا کہنا ہے کہ موٹر سائیکل اور رقم چھن جانے کے باعث وہ شدید مالی مشکلات کا شکار ہے اور اجیروں کا قرض ادا کرنے سے بھی قاصر ہے۔ متاثرہ مزدور نے صدر مملکت آصف علی زرداری، چیئرمین پیپلز پارٹی بلاول بھٹو زرداری، فریال تالپور، وزیر داخلہ ضیاء الحسن لنجار، ڈی آئی جی شہید بینظیرآباد اور ایس ایس پی شہید بینظیرآباد سے اپیل کی ہے کہ واقعے کا نوٹس لے کر ملزمان کو گرفتار، مسروقہ موٹر سائیکل و رقم برآمد اور اسے انصاف فراہم کیا جائے۔