اٹک؛ ویلفیئر فنڈز چند لاکھ ڈی پی او حیران، اکاؤنٹنٹ کا راجن پور تبادلہ، ریڈر تبدیل، کرپٹ افسران پریشان

اٹک(بے نقاب رپورٹ)
اٹک پولیس میں مختلف شکایات اور انتظامی امور کا جائزہ لینے کے بعد ڈی پی او اٹک کیپٹن (ر) علی بن طارق نے دفتر کے سٹاف اور متعدد تھانوں کے ایس ایچ اوز کے تبادلے کر دیے ہیں، جبکہ طویل عرصے سے ایک ہی سیٹ پر تعینات اہلکاروں کی فہرستیں بھی طلب کیں جس کے بعد ڈی پی او اٹک نے پولیس ویلفیئر فنڈز سمیت مختلف مالی و انتظامی امور پر متعلقہ افسران سے بریفنگ لی۔ اس دوران ویلفیئر فنڈز کی موجودہ صورتحال سے متعلق معلومات حاصل کی تو چند لاکھ روپے کا سن کر حیران رہ گئے ذرائع کا کہنا ہے کہ انکوائری کے بعد سینئر کلرک و اکاؤنٹنٹ عامر شہزاد گل کا تبادلہ راجن پور کروا دیا گیا۔ حالانکہ جب ڈی پی او لودھراں کا چارج چھوڑا اسوقت 4 کڑور ویلفئیر فنڈز تھے۔ اسی طرح ڈی پی او اٹک دفتر اٹک میں طویل عرصے سے تعینات ریڈر انسپکٹر طفیل کو بھی تبدیل کرکے ان کی جگہ انسپکٹر جنید کو ریڈر تعینات کیا گیا، سابقہ ریڈر طفیل کا ایس ایچ اوز کی ٹرانسفر پوسٹنگ میں اہم کردار ہوتا تھا۔ او ایس آئی اٹک کو بھی تبدیل کرکے سب انسپکٹر محمود کو ذمہ داری سونپی گئی ہے۔ اٹک پولیس کے ذرائع کے مطابق ضلع میں پولیس کے تین پٹرول پمپس بھی موجود ہیں، جن کے انتظامی معاملات سمیت بعض اہم امور میں دفتر کے بعض اہلکاروں کا کردار اہم سمجھا جاتا رہا ہے۔ ذرائع کا دعویٰ ہے کہ طویل عرصے سے ایک ہی اہم عہدے پر تعیناتی کے باعث بعض اہلکاروں کا تبادلے اور پوسٹنگ کے معاملات میں بھی اثر و رسوخ قائم تھا، تاہم نئی انتظامیہ نے اس صورتحال کا ازسرنو جائزہ لینا شروع کر دیا ہے۔ دوسری جانب ڈی پی او کی جانب سے منعقد کی گئی پہلی کھلی کچہری میں شہریوں نے پولیس سے متعلق متعدد شکایات پیش کیں۔ ذرائع کے مطابق شکایات پر ڈی پی او نے متعلقہ ایس ایچ اوز کی سرزنش کی جبکہ بعض سرکل افسران سے بھی وضاحت طلب کی گئی۔ ذرائع کا کہنا ہے کہ کھلی کچہری کے بعد اٹک پولیس کے مجموعی رویے میں نمایاں تبدیلی دیکھنے میں آ رہی ہے اور افسران کو شہریوں کی شکایات کے فوری ازالے اور تھانوں میں سائلین کے ساتھ بہتر رویے کی ہدایات جاری کی گئی ہیں۔