بغداد: عراق میں بدعنوانی اور کرپشن کے خلاف جاری سخت کارروائیوں کے دوران فیڈرل کمیشن برائے دیانت داری (انٹیگریٹی کمیشن) نے وزارتِ بجلی کے ٹرانسمیشن اور ڈسٹری بیوشن امور کے ڈپٹی وزیر کے گھر پر چھاپہ مار کر کروڑوں روپے، لاکھوں امریکی ڈالر اور سونے کی قیمتی اینٹیں ضبط کر لی ہیں۔
کمیشن کی جانب سے جاری کردہ تفصیلات اور ویڈیوز کے مطابق یہ کارروائی عدالت کے باضابطہ حکم پر عمل میں لائی گئی۔ بغداد انویسٹی گیشن ڈائریکٹوریٹ کی خصوصی ٹیم نے وزارتِ بجلی کے ڈپٹی وزیر خالد غازی عطیہ سے وابستہ مختلف مقامات اور گھروں پر چھاپے مارے۔
تلاشی کے دوران حکام نے کروڑوں روپے مالیت کا زائر ذخیرہ برآمد کیا، جس میں مندرجہ ذیل اشیاء شامل ہیں:ایک ارب 17 کروڑ 50 لاکھ عراقی دینار نقد۔58 لاکھ 39 ہزار امریکی ڈالر نقد،سونے کی 7 قیمتی اینٹیں اور سونے کے دیگر زیورات و اشیاء
واضح رہے کہ یہ ہنگامہ خیز کارروائی عراقی حکومت کی جانب سے رواں سال 28 جون کو بدعنوان سیاست دانوں، ارکانِ پارلیمان اور با اثر کاروباری شخصیات کے خلاف شروع کی جانے والی ملک گیر انسدادِ بدعنوانی مہم ’آپریشن ڈان سٹرائیک‘ کا ہی ایک حصہ ہے، جس کے تحت کرپٹ عناصر کے خلاف شکنجہ مزید تنگ کیا جا رہا ہے۔
