دیر بالا (بیورو چیف ریاض ابوالخیل)
ڈی پی او دیر بالا اسلم نواز کی زیر نگرانی تھانہ دیر سٹی کی حدود دوبندو اور ملحقہ علاقوں میں دیر بالا پولیس اور دیر سکاوٹس کا دوبندو درہ میںمشترکہ ٹارگٹڈ آپریشن جاری ہے۔
آپریشن میں ایلیٹ فورس، آرآرایف،سی ٹی ڈی اور بم ڈسپوزل اسکواڈ حصہ لے رہے ہیں، جبکہ جدید تھرمل آلات، ڈرون کیمروں اور بکتر بند گاڑیوں کے ذریعے علاقے کی نگرانی کی جا رہی ہے۔ڈی پی او اسلم نواز نے جاری آپریشن میں خود شرکت کرتے ہوئے سکیورٹی انتظامات کا جائزہ لیا
اور جوانوں کی پیشہ ورانہ کارکردگی کو سراہا۔ انہوں نے کہا کہ دہشت گردوں، سہولت کاروں اور امن دشمن عناصر کے خلاف کارروائیاں بھرپور انداز میں جاری رہیں گی۔ڈی پی او دیر بالا نے عوام سے اپیل کی کہ مشکوک افراد یا سرگرمیوں کی فوری اطلاع پولیس کو دیں۔ عوام کا تعاون ہی دیر میں پائیدار امن کی ضمانت ہے۔