تخت سری حضور صاحب میں پنجاب کے سابق نائب وزیر اعلیٰ سکھبیر سنگھ بادل پر قاتلانہ حملہ،

مہاراشٹر: شرومنی اکالی دل کے سربراہ اور پنجاب کے سابق نائب وزیر اعلیٰ سکھبیر سنگھ بادل پر مہاراشٹر کے شہر ناندیڑ میں ایک اور جان لیوا حملہ کیا گیا ہے۔
یہ ہولناک واقعہ جمعرات کے روز معروف مذہبی مقام ‘تخت سری حضور صاحب’ کے احاطے میں اس وقت پیش آیا جب سکھبیر سنگھ بادل وہاں حاضری دینے اور ماتا صاحب گوردوارہ کی طرف جا رہے تھے۔
ابتدائی اطلاعات کے مطابق ایک حملہ آور نے اچانک ان پر کرپان سے وار کرنے کی کوشش کی۔ تاہم، موقع پر موجود سکیورٹی اہلکاروں کی پھرتی اور بروقت مداخلت کے باعث سکھبیر سنگھ بادل کو کسی بڑے اور سنگین جانی نقصان سے محفوظ رہے۔ ان کی حفاظت پر مامور ایک پولیس اہلکار شدید زخمی ہو گیا۔ واقعے کے فوراً بعد سکھبیر سنگھ بادل کو ابتدائی طبی امداد کے لیے نجی اسپتال منتقل کر دیا گیا۔
پولیس نے موقع پر ہی کارروائی کرتے ہوئے مبینہ حملہ آور کو حراست میں لے لیا ہے اور اس بات کی گہرائی سے تفتیش کی جا رہی ہے کہ اس حملے کے پیچھے کوئی ذاتی دشمنی، سیاسی رنجش یا کوئی گہری سازش کارفرما تھی۔
واضح رہے کہ سکھبیر سنگھ بادل پر اس سے قبل بھی حملہ کرنے کی کوشش کی جا چکی ہے۔ دسمبر 2024 میں امرتسر کے تاریخی گولڈن ٹیمپل کے باہر بھی ایک شخص نے ان پر پستول سے فائرنگ کی ناگام کوشش کی تھی، جسے سکیورٹی گارڈز نے بروقت دبوچ لیا تھا۔ ناندیڑ میں پیش آنے والے اس تازہ واقعے کے بعد سکھ سیاسی حلقوں اور سکیورٹی اداروں میں شدید ہلچل مچ گئی ہے۔