منچن آباد(راشد ڈھڈی)
ہر سال جب اگست کا مہینہ شروع ہوتا ہے،تو فضاؤں میں ایک الگ ہی نکھار، ایک نیا ولولہ اور وطن سے محبت کا احساس گھل جاتا ہے۔پورا ملک سبز و ہلالی پرچموں کی چھاؤں میں جشنِ آزادی منانے کی تیاریوں میں مصروف ہو جاتا ہے۔اسی پس منظر میں جب ہم پاکستان کے خوبصورت شہر منچن آباد کا رخ کرتے ہیں،تو یہاں بھی یومِ آزادی کی تیاریاں پورے عروج پر دکھائی دیتی ہیں اور ہر دل میں حبِ وطن کا جذبہ ہے۔منچن آباد کے بازار اِن دنوں کسی دلہن کی طرح سجے ہوئے ہیں۔دکانیں ہوں یا سڑکوں کے کنارے لگے عارضی اسٹالز،ہر طرف ہرا اور سفید رنگ اپنی کہانیاں سنا رہا ہے۔بچے،بوڑھے،نوجوان اور خواتین سب ہی اس خوشی میں بڑھ چڑھ کر حصہ لے رہے ہیں۔دکانوں پر لٹکے ہوئے قومی پرچم، خوبصورت جھنڈیاں،ہری اور سفید ٹی شرٹس،کیپس اور بچوں کے لیے خصوصی ملبوسات ہر ایک کی توجہ کا مرکز بنے ہوئے ہیں۔منچن آباد کے گلی محلوں میں بچوں کا جوش دید کے قابل ہے۔ صبح سویرے سے لے کر دیر شام تک گلیوں میں "دل دل پاکستان، جان جان پاکستان” اور "یہ وطن تمہارا ہے، تم ہو پاسبان اس کے” جیسے ملی نغمے فضا میں گونج رہے ہوتے ہیں۔نوجوانوں نے اپنے موٹر سائیکلوں اور کاروں پر سبزہ و ہلالی پرچم سجا رکھے ہیں، جنہیں دیکھ کر وطن کے ساتھ وفاداری اور محبت کا ایک احساس جاگ اٹھتا ہے۔بچوں کا جوش اور دکانوں پر رونق استصالوں پر کھلونے،بیجز،ہاتھ پر باندھنے والے پٹے اور سبز و سفید پرچم تھامے بچے انتہائی خوش نظر آتے ہیں۔دکانداروں کے پاس خریداروں کا تانتا بندھا ہوا ہے اور ہر کوئی اپنے گھر،دکان اور گاڑی کو سجانے کے لیے بہترین اشیاء خریدنے میں مصروف ہے۔دکانوں پر سجے ہوئے پرچم اور سجاوٹ کا سامان منچن آباد کی سڑکوں پر ایک خاص رونق بکھیر رہا ہے، جہاں ہر چہرہ خوشی سے چمک رہا ہے۔منچن آباد میں 14 اگست کی یہ تیاریاں صرف ظاہری سجاوٹ تک محدود نہیں ہیں، بلکہ یہ اس بات کا ثبوت ہیں کہ یہاں کے بسنے والے اپنے پیارے وطن سے بے پناہ محبت کرتے ہیں۔ یہ دن ہمیں اپنے اُن اسلاف کی قربانیوں کی یاد دلاتا ہے جنہوں نے اس دھرتی کو حاصل کرنے کے لیے گراں قدر قربانیاں دیں۔منچن آباد کے باسی اِس پُر مسرت موقع پر یہ عہد کرتے ہیں کہ وہ اپنے اس چمن کی حفاظت،ترقی اور خوشحالی کے لیے ہمیشہ شانہ بشانہ کھڑے رہیں گے۔یومِ آزادی کا یہ تہوار منچن آباد کے کونے کونے میں اتحاد،یکجہتی اور امن کا پیغام عام کر رہا ہے اور سبز و ہلالی پرچم کی شان تاقیامت بلند رکھنے کا عزم تازہ کر رہا ہے۔ پاکستان زندہ باد! منچن آباد پائندہ باد!