واڑی: (بیورو چیف ریاض ابوالخیل)
گورنمنٹ ہائی سکول واڑی کے ہیڈ ماسٹر اور معروف ماہرِ تعلیم عالمزیب صاحب 60 سال کی عمر میں 37 سالہ طویل، شاندار اور قابلِ تقلید ملازمت مکمل کرنے کے بعد آج باوقار انداز میں سبکدوش ہوگئے۔ اس موقع پر گورنمنٹ ہائی سکول واڑی میں ایک پروقار اور یادگار الوداعی تقریب cانعقاد کیا گیا، جس میں سکول کے طلبہ و اساتذہ، سابق و موجودہ رفقائے کار اور مختلف طبقۂ فکر سے تعلق رکھنے والے افراد نے بھرپور شرکت کی۔تقریب میں مقررین نے عالمزیب کی طویل تدریسی خدمات کو خراجِ تحسین پیش کرتے ہوئے کہا کہ انہوں نے اپنی پوری ملازمت کے دوران نہ صرف طلبہ کی علمی و اخلاقی تربیت پر خصوصی توجہ دی بلکہ جہاں بھی خدمات انجام دیں، وہاں اپنی قابلیت، ذہانت، فرض شناسی، شائستگی اور حسنِ اخلاق کے انمٹ نقوش چھوڑے۔ وہ ایک شفیق استاد، قابل منتظم اور مثالی سکول سربراہ کی حیثیت سے ہمیشہ یاد رکھے جائیں گے۔
عالمزیب صاحب نے اپنی 37 سالہ ملازمت کے دوران مختلف تعلیمی اداروں اور تقریباً تین سے چار سٹیشنوں پر اپنی خدمات انجام دیں، جہاں انہوں نے تدریس کے ساتھ ساتھ اداروں کی انتظامی بہتری اور طلبہ کی کردار سازی میں بھی اہم کردار ادا کیا۔ ۔
الوداعی تقریب کے دوران اساتذہ اور طلبہ نے عالمزیب کو ہار پہنائے، پھولوں کے خوبصورت گلدستے پیش کیے اور مختلف تحائف سے نوازا۔ اس موقع پر جذباتی مناظر بھی دیکھنے میں آئے اور کئی طلبہ و اساتذہ اپنے شفیق استاد اور محبوب سربراہ کی جدائی پر آبدیدہ ہوگئے۔
سکول انتظامیہ اور اساتذہ نے عالمزیب کی خدمات کو سراہتے ہوئے کہا کہ ان کی شخصیت ادارے کے لیے ایک اثاثہ تھی۔