سیالکوٹ۔سلیم احمد اعوان شیخو
پاکستان پیپلز پارٹی کے شریک چیئرپرسن و ممبر قومی اسمبلی بلاول بھٹو زرداری نے کہا ہے کہ ہم نے الٹی گنتی شروع نہیں کی ہے بلکہ حکمرانوں کی اپنی غلطیوں اور کوتاہیوں و عوام کو ریلیف نہ دینے کی وجہ سے الٹی گنتی شروع ہو چکی ہے جبکہ حکمرانوں کو اب بھی اگر عوام کو ریلیف دینے کے لئے کوئی احساس نہ ہوا تو پھر حکمران گھر ہی جائیں گے جبکہ پاکستان پیپلز پارٹی نے ہر موڑ پر حکمرانوں کا ساتھ دیا ہے لیکن افسوس کا مقام یہ ہے کہ حکمرانوں نے ہمیشہ اپنا مطلب نکلنے کے بعد پاکستان پیپلز پارٹی کی پیٹھ میں چھرا ہی گھونپا ہے۔یہ بات انھوں نے پاکستان پیپلز پارٹی سیالکوٹ کے راہنماوں اظہر علی دیال،احسن اسماعیل گجر،عارف چودہری,شکیل احمد علوی،ملک علی نصیر اعوان،افتاب حیدر،عبدالقیوم ہنجرا اور دیگر پارٹی راہنماؤں سے ایک پیغام کے ذریعہ کی۔بلاول بھٹو زرداری نے کہا کہ پاکستان پیپلز پارٹی کو ختم کرنے والے خود ختم ہو گئے ہیں لیکن پاکستان پیپلز پارٹی زندہ ہے اور زندہ رہے گی جبکہ یہ پارٹی پہلے سے زیادہ مضبوط پارٹی بن گئی ہے کیونکہ یہ پارٹی میرے نانا ذوالفقار علی بھٹو شہید نے بنائی تھی اور بھٹو شہید آج بھی عوام کے دلوں میں بستا ہے۔انھوں نے کہ آزاد ریاست جموں و کشمیر کے حالیہ انتخابات میں صوبہ پنجاب میں 12 نشستوں پر پنجاب حکومت نے کھلم کھلا دھاندلی کی ہے بلکہ پولنگ سٹاف نے خود اپنے ہاتھوں سے مسلم لیگ ن کے امیدواروں کے انتخابی نشانات پر بیلٹ پیپرز پر مہریں لگا کر بیلٹ بکس میں ڈال دئیے اور کئی ووٹرز جب پولنگ سٹیشن پر ووٹ ڈالنے گئے تو ان کو کہا گیا کہ آپ کا ووٹ ڈال دیا گیا۔انھوں نے کہا کہ سیالکوٹ سے مذکورہ انتخابات کے حلقہ ایل اے 36 جموں 3 سے پاکستان پیپلز پارٹی کا امید وار احسن اسماعیل گجر ایڈووکیٹ جیت گیا لیکن فارم 47 کے تحت بننے والی حکومت نے رزلٹ تبدیل کر کے مسلم لیگ ن کے امیدوار کو کامیاب کروا دیا۔انھوں نے کہا کہ آزاد ریاست جموں و کشمیر میں مسلم لیگ ن کی حکومت کیسے بنے گی کیونکہ پاکستان میں مسلم لیگ ن کی حکومت کی الٹی گنتی شروع ہو چکی ہے اور کسی وقت بھی اس الٹی گنتی کا اثر ایسا ہو گا کہ حکومت کا بگل بج جائے گا۔انھوں نے پاکستان پیپلز پارٹی کے راہنماوں و کارکنوں پر زور دیتے ہوئے کہا کہ پارٹی کے بھٹو مشن کے تحت کام کریں اور پارٹی کی ساکھ کو مضبوط تر مضبوط بنائیں۔