سیالکوٹ، سلیم احمد اعوان شیخو
وزیر اعلیٰ پنجاب مریم نواز شریف کے وژن کے مطابق شہرِ اقبال کو روشن، محفوظ اور خوبصورت بنانے کے لیے میونسپل کارپوریشن سیالکوٹ نے خصوصی "روشن سیالکوٹ مہم” کا آغاز کر دیا ہے۔ ڈپٹی کمشنر سیالکوٹ اویس مشتاق اور ایڈمنسٹریٹر میونسپل کارپوریشن میاں سرمد حسین کی ہدایت پر چیف آفیسر میونسپل کارپوریشن زبیر وٹو نے کچا شہاب پورہ روڈ کا دورہ کیا اور اسٹریٹ لائٹس کی سو فیصد بحالی کے لیے شروع کی گئی 60 روزہ خصوصی مہم کے انتظامات اور پیش رفت کا تفصیلی جائزہ لیا۔
چیف آفیسر زبیر وٹو نے بتایا کہ مہم کا باقاعدہ آغاز شہاب پورہ اور نیکا پورہ کی یونین کونسلز سے کر دیا گیا ہے، جسے مرحلہ وار میونسپل کارپوریشن کی تمام حدود تک توسیع دی جائے گی۔ انہوں نے کہا کہ اس وقت میونسپل کارپوریشن کی حدود میں تقریباً 2 ہزار اسٹریٹ لائٹس غیر فعال ہیں، جنہیں 60 روز کے اندر مکمل طور پر فعال کرنے کا ہدف مقرر کیا گیا ہے۔
انہوں نے مزید بتایا کہ شعبہ اسٹریٹ لائٹس کا عملہ ضروری مشینری، نئی لائٹس اور دیگر ساز و سامان کے ساتھ روزانہ دو یونین کونسلز میں کام کرے گا۔ کسی بھی یونین کونسل میں کام مکمل کیے بغیر عملہ اگلے علاقے میں منتقل نہیں ہوگا، تاکہ ہر یونین کونسل میں سو فیصد اسٹریٹ لائٹس بحال کی جا سکیں۔
چیف آفیسر زبیر وٹو نے کہا کہ "روشن سیالکوٹ مہم” کا مقصد شہریوں کو رات کے وقت محفوظ اور بہتر سفری سہولیات فراہم کرنا، ٹریفک حادثات کی روک تھام، امن و امان کی صورتحال کو مزید بہتر بنانا اور شہر کی خوبصورتی میں اضافہ کرنا ہے۔ انہوں نے متعلقہ افسران کو ہدایت کی کہ معیار پر کسی قسم کا سمجھوتہ کیے بغیر تمام دستیاب وسائل بروئے کار لاتے ہوئے مقررہ مدت میں ہدف مکمل کیا جائے۔