بالی وڈ:مقبول ترین انڈین ویب سیریز کے مداحوں کے لیے بڑی خوشخبری سامنے آئی ہے کہ فلمی پردے پر دھوم مچانے کے لیے تیار ‘مرزاپور: دی مووی’ کی ریلیز سے قبل پروڈکشن ہاؤس ‘ایکسل انٹرٹینمنٹ’ اور ‘ایمیزون ایم جی ایم اسٹوڈیو’ نے فلم کا پہلا سنسنی خیز ساؤنڈ ٹریک گانا ‘دو نمبری’ جاری کر دیا ہے۔ اس گانے کے ذریعے ہریانوی میوزک انڈسٹری کے نامور گلوکار ڈھنڈا نیولی والا نے باضابطہ طور پر بالی ووڈ کی دنیا میں قدم رکھ دیا ہے۔
اپنی منفرد گائیکی اور وائرل گانوں کے لیے معروف ڈھنڈا نیولی والا نے اس گانے کو خود ہی تحریر کیا، کمپوز کیا اور اپنی آواز سے سجایا ہے۔ توانائی اور طاقتور ہریانوی دھڑکنوں سے بھرپور یہ گانا مرزاپور کی کچی، بے باک اور پرتشدد دنیا کے مزاج سے بالکل مطابقت رکھتا ہے، جس نے ریلیز ہوتے ہی مداحوں کا جوش دواترہ کر دیا ہے۔
فلم کی کاسٹ اور بڑے کرداروں کی واپسی: ‘مرزاپور: دی مووی’ ناظرین کو ایک بار پھر اس کے سیزن ون کی پرانی اور سنسنی خیز دنیا میں واپس لے جائے گی۔ فلم میں فرنچائز کے سب سے زیادہ مقبول اور چاہنے والے کردار بڑے پردے پر جلوہ گر ہوں گے، جن میں گڈو پنڈت (علی فضل)، منا بھیا (دیویندو) اور کالین بھیا (پنکج ترپاٹھی) شامل ہیں۔ ان کے علاوہ جتیندر کمار، روی کشن، رسیکا ڈوگل، شویتا ترپاٹھی اور دیگر نامور فنکار بھی اہم کرداروں میں نظر آئیں گے۔
اس فلم کو ایمیزون ایم جی ایم اسٹوڈیوز اور ایکسل انٹرٹینمنٹ کے بینر تلے رتیش سدھوانی اور فرحان اختر نے پروڈیوس کیا ہے جبکہ اس کی ہدایت کاری گرمیت سنگھ نے دی ہے اور کہانی پونیت کرشنا نے لکھی ہے۔ شائقین کے لیے یہ اہم خبر ہے کہ یہ فلم رواں سال 4 ستمبر 2026 کو دنیا بھر کے سینما گھروں میں ہندی اور تیلگو زبانوں میں نمائش کے لیے پیش کی جائے گی۔
‘مرزاپور: دی مووی’ کا پہلا گانا ’دو نمبری‘ ریلیز، ہریانوی گلوکار ڈھنڈا نیولی والا نے بالی ووڈ میں ڈیبیو کر لیا!
