کوبرا گینگ 400 سے ذائد افراد سے بھتہ وصولی مقدمات درج نہیں کروائے سی سی ڈی نے تحقیقات کا دائرہ وسیع کر دیا

اٹک (بے نقاب نیوز رپورٹ) کوبرا گینگ کے مبینہ سربراہ ضرغام اللہ کی پولیس مقابلے میں ہلاکت کے بعد اگرچہ شہریوں نے ایک حد تک سکھ کا سانس لیا، تاہم مقامی حلقوں کا کہنا ہے کہ گینگ کے مبینہ اشتہاری رکن عاصم کی گرفتاری یا اس کے بارے میں حتمی معلومات سامنے آنے تک خوف مکمل طور پر ختم نہیں ہوا۔ تحقیقاتی ذرائع کے مطابق عاصم کی تلاش تیز کر دی گئی ہے، جبکہ اطلاعات ہیں کہ وہ غیر قانونی طریقے سے بیرون ملک فرار ہو چکا ہے، تاہم اس حوالے سے تاحال کوئی سرکاری تصدیق سامنے نہیں آئی۔ دوسری جانب اس خطرناک گینگ کا برسوں تک سرگرم رہنا اور مقامی سطح پر اس کے مبینہ نیٹ ورک کی موجودگی نے اٹک پولیس کی کارکردگی پر بھی کئی سوالات کھڑے کر دیے ہیں۔ پولیس ذرائع کے مطابق ضرغام اللہ اور اس کے ساتھیوں پر قتل، بھتہ خوری، اغوا برائے تاوان اور دیگر سنگین جرائم میں ملوث ہونے کے الزامات تھے۔
تحقیقاتی ذرائع کا دعویٰ ہے کہ گینگ کے خوف کے باعث چار سو سے زائد ایسے متاثرین بھی سامنے نہیں آئے جن سے مبینہ طور پر بھتہ یا تاوان وصول کیا گیا، کیونکہ وہ جان و مال کے تحفظ کے خدشات کے باعث پولیس سے رجوع کرنے سے گریز کرتے رہے۔ ان دعوؤں کی سرکاری سطح پر تاحال تصدیق نہیں ہو سکی۔
ذرائع کے مطابق گینگ کا نیٹ ورک اٹک کے مختلف علاقوں تک پھیلا ہوا تھا، جہاں مبینہ سہولت کار کاروباری شخصیات اور صاحبِ حیثیت افراد سے متعلق معلومات فراہم کرتے تھے، جس کے بعد انہیں مبینہ طور پر بھتہ کے لیے نشانہ بنایا جاتا تھا۔ ذرائع کا یہ بھی دعویٰ ہے کہ ضرغام اللہ مبینہ طور پر جوئے کے اڈوں سے بھتہ وصول کرتا تھا اور بعض مواقع پر بکیوں کو بھی لوٹنے کی وارداتوں میں ملوث رہا۔ چند ہی برسوں میں اس کا نام علاقے میں خوف اور دہشت کی علامت بن گیا۔ تحقیقاتی ذرائع کے مطابق سی سی ڈی نے آپریشن کے بعد تحقیقات کا دائرہ مزید وسیع کر دیا ہے۔ مبینہ سہولت کاروں، پناہ دینے والے افراد، مالی معاونت کرنے والوں اور گینگ سے ممکنہ روابط رکھنے والے عناصر کی مختلف پہلوؤں سے چھان بین جاری ہے۔ ذرائع کے مطابق اگر تحقیقات کے دوران کسی سرکاری اہلکار یا ادارے سے وابستہ فرد کا کردار سامنے آیا تو اس کے خلاف بھی قانون کے مطابق کارروائی عمل میں لائی جائے گی۔
تحقیقات سے وابستہ حکام کا کہنا ہے کہ کارروائی کا مقصد صرف کوبرا گینگ کا خاتمہ نہیں بلکہ اس پورے مبینہ نیٹ ورک، اس کی مالی معاونت، سہولت کاری اور پشت پناہی کرنے والے تمام کرداروں کو قانون کے کٹہرے میں لانا بھی ہے۔ آنے والے دنوں میں اس حوالے سے مزید اہم پیش رفت متوقع ہے۔