ریاض+لندن :امریکا اور ایران کے درمیان جاری شدید سیاسی و عسکری کشیدگی کے باوجود عالمی منڈی میں خام تیل کی قیمتوں میں غیر متوقع کمی کا رجحان ریکارڈ کیا گیا ہے۔
بین الاقوامی خبر رساں ادارے کی رپورٹ کے مطابق، عالمی مارکیٹ میں برینٹ خام تیل کی فی بیرل قیمت میں 1.29 ڈالر کی کمی واقع ہوئی ہے، جس کے بعد برینٹ آئل کی نئی قیمت 89.45 ڈالر فی بیرل پر آ گئی ہے۔ اسی طرح امریکی خام تیل یعنی ویسٹ ٹیکساس انٹرمیڈیٹ (WTI) کے نرخوں میں بھی گراوٹ دیکھی گئی ہے؛ ڈبلیو ٹی آئی خام تیل 56 سینٹ یا 0.66 فیصد کمی کے بعد 83.90 ڈالر فی بیرل کی سطح پر ٹریڈ کر رہا ہے۔
رپورٹس کے مطابق، مشرقِ وسطیٰ میں واشنگتن اور تہران کے مابین تناؤ میں اضافے کے باوجود سمندری حدود میں تیل بردار جہازوں (ٹینکرز) کی آمدورفت اور ترسیل کا عمل معمول کے مطابق بلاتعطل جاری ہے۔ سپلائی لائنز محفوظ رہنے کے باعث عالمی مارکیٹ میں قیمتوں پر پایا جانے والا دباؤ کم ہو گیا ہے۔
واضح رہے کہ اس گراوٹ سے پہلے جنگی خدشات اور خطرات کے باعث تیل کی قیمتوں میں بڑا اچھال آیا تھا، اور گزشتہ کاروباری سیشن کے اختتام پر برینٹ خام تیل 7.91 فیصد جبکہ ڈبلیو ٹی آئی 6.56 فیصد کے نمایاں اضافے کے ساتھ بند ہوا تھا۔
