نئی دہلی:نئی دہلی کے جنتر منتر پر طلبہ کے ’سنسد چلو‘ احتجاج کے دوران ڈیوٹی کے دوران تشدد کا نشانہ بننے والے پولیس اہلکاروں کے اہل خانہ نے انصاف کے حصول کے لیے سپریم کورٹ کا دروازہ کھٹکھٹایا ہے۔
متاثرہ خاندانوں نے عدالتِ عظمیٰ میں دائر کی گئی درخواست میں پُر زور مطالبہ کیا ہے کہ ’’آن ڈیوٹی پولیس اہلکار کو بھی عام شہریوں کی طرح زندگی اور شخصی آزادی کے بنیادی حق کا مکمل تحفظ فراہم کیا جائے۔‘‘
یہ اہم پٹیشن زخمی اے ایس پی کیلاش سنگھ بسٹ، اے ایس آئی سندیپ، کانسٹیبل دھیرج اور اے ایس آئی ہیمندر راٹھی کے اہل خانہ کے اراکین (لکشے سنگھ بسٹ، کنجل، نشا یادو اور اکشت راٹھی) کی جانب سے مشترکہ طور پر دائر کی گئی ہے، جس میں استدعا کی گئی ہے کہ عدالت مظاہروں سے متعلق گائیڈلائنز طے کرتے وقت پولیس اہلکاروں کا موقف بھی ضرور سنے۔
درخواست میں انکشاف کیا گیا ہے کہ 20 سے 25 جولائی 2026 کے دوران جنتر منتر پر 20 ہزار سے زائد مظاہرین کی بے قابو بھیڑ کو قابو میں کرنے کے لیے پولیس فورس تعینات کی گئی تھی۔ اس دوران 20 جولائی کو بیریکیڈس توڑنے اور پرتشدد جھڑپوں کے نتیجے میں 130 سے زائد پولیس اہلکار زخمی ہو گئے تھے۔ صورتحال یہیں پر ختم نہیں ہوئی بلکہ 24 اور 25 جولائی کو بھی مظاہرین کی جانب سے شدید پتھراؤ اور نوکیلی ٹائلوں سے حملے کیے گئے، جس میں کئی سینئر پولیس افسران بھی شدید زخمی ہوئے۔ ان تمام پرتشدد واقعات میں مجموعی طور پر زخمی ہونے والے پولیس اہلکاروں کی تعداد تقریباً 200 تک پہنچ چکی ہے۔
درخواست گزاروں کا کہنا ہے کہ آئین کی دفعہ 21 (حقِ زندگی) اور دفعہ 14 (حقِ مساوات) عام شہریوں کی طرح آن ڈیوٹی پولیس اہلکاروں پر بھی یکساں طور پر نافذ ہوتے ہیں۔ اگرچہ آئین کی دفعہ 19 شہریوں کو احتجاج اور اظہارِ رائے کی آزادی دیتی ہے، لیکن اس کی بھی واضح حدود ہیں اور یہ قانون نافذ کرنے والے سرکاری ملازمین پر تشدد کرنے یا ان کی جانوں کو خطرے میں ڈالنے کی ہرگز اجازت نہیں دیتی۔
پٹیشن میں عدالتِ عظمیٰ سے پُر زور مطالبہ کیا گیا ہے کہ زیرِ سماعت اصل مقدمے میں پولیس اہلکاروں کے اہل خانہ کو بھی باضابطہ فریق کے طور پر شامل کیا جائے تاکہ اس تنازعے میں صرف مظاہرین کا نہیں بلکہ زخمی پولیس اہلکاروں کا انسانی پہلو بھی عدالت کے سامنے آ سکے۔ اس کے علاوہ یہ بھی مطالبہ کیا گیا ہے کہ پولیس فورسز کے خلاف تشدد بھڑکانے والے عناصر کی سخت جوابدہی طے کی جائے اور ڈیوٹی پر مامور پولیس اہلکاروں کے تحفظ کے لیے ملک بھر کے لیے سخت نیشنل گائیڈلائنز جاری کی جائیں
"کیا وردی پہننے والوں کو جینے کا حق نہیں؟”جنتر منتر پر زخمی ہونیوالے پولیس والے سپریم کورٹ پہنچ گئے
