ٹنڈوالہیار رپورٹ تیمور رضا قائم خانی
ڈپٹی کمشنر ٹنڈوالہیار نور مصطفیٰ لغاری نے ٹنڈوالہیار تا ٹنڈوآدم ڈوئل کیرج وے روڈ کا دورہ کیا اور مجوزہ منصوبے کے آغاز سے قبل راستے میں قائم تجاوزات کا جائزہ لیا دورے کے دوران اسسٹنٹ کمشنر ٹنڈوالہیار بابر صالح راہپوٹہ، مختیارکار ٹنڈوالہیار نیاز سیال اور متعلقہ محکموں کے دیگر افسران بھی ڈپٹی کمشنر کے ہمراہ موجود تھے۔ ڈپٹی کمشنر نے سڑک کے اطراف قائم تجاوزات، سرکاری اراضی کی صورتحال اور منصوبے کے آغاز میں درپیش ممکنہ رکاوٹوں کا معائنہ کیا اور متعلقہ افسران سے تفصیلی بریفنگ حاصل کی اس موقع پر ڈپٹی کمشنر نور مصطفیٰ لغاری نے متعلقہ افسران کو ہدایت کی کہ ڈوئل کیرج وے منصوبے کی بروقت شروعات کو یقینی بنانے کے لیے راستے میں قائم تمام غیر قانونی تجاوزات کو قانون کے مطابق مرحلہ وار ختم کیا جائے۔ انہوں نے کہا کہ تجاوزات کے خاتمے کے دوران شہریوں کے ساتھ قانون کے مطابق اور مناسب طریقہ اختیار کیا جائے، تاہم سرکاری اراضی پر کسی قسم کا غیر قانونی قبضہ یا تجاوز برداشت نہیں کیا جائے گا ڈپٹی کمشنر نے مزید ہدایت کی کہ تمام متعلقہ محکمے باہمی رابطے کے ساتھ کارروائی مکمل کریں تاکہ تجاوزات سے پاک جگہ تعمیراتی ادارے کے حوالے کی جا سکے اور ڈوئل کیرج وے منصوبے پر مقررہ شیڈول کے مطابق کام کا آغاز ممکن بنایا جا سکے۔ انہوں نے کہا کہ یہ منصوبہ عوام کو بہتر، محفوظ اور جدید سفری سہولیات کی فراہمی میں اہم کردار ادا کرے گا۔