لاہور:وزیر اعلیٰ پنجاب مریم نواز شریف کے ہنگامی اقدامات اور مؤثر حکمت عملی کی بدولت صوبے کے شدید بارش سے متاثرہ علاقوں میں ریکارڈ مدت میں نکاسی آب کا کام مکمل کر لیا گیا ہے۔ پنجاب کے 41 اضلاع میں واسا کے قیام اور ایک ہزار سے زائد جدید مشینری و عملے کی چوبیس گھنٹے موجودگی کے باعث ہفتوں کا کام اب گھنٹوں میں سمٹ آیا ہے، اور طوفانی بارشوں کے باوجود شہروں کو ڈوبنے سے بچا لیا گیا ہے۔
ضلع گجرات میں تین گھنٹوں کے اندر اندر مون سون کی شدید بارشوں سے جمع ہونے والا سارا پانی صاف کر دیا گیا، جس پر شہریوں کی جانب سے وزیر اعلیٰ مریم نواز شریف کو زبردست خراجِ تحسین پیش کیا گیا ہے۔
بارشوں کے ریکارڈ اعداد و شمار اور ڈیموں کی صورتحال
ترجمان پی ڈی ایم اے کے مطابق گزشتہ 24 گھنٹوں کے دوران پنجاب کے بیشتر اضلاع میں شدید مون سون بارشیں ریکارڈ کی گئیں۔ سب سے زیادہ بارش گوجرانوالہ میں 250 ملی میٹر، سیالکوٹ میں 139، منڈی بہاؤالدین میں 138، نارووال میں 117، حافظ آباد میں 85، چکوال میں 70، اوکاڑہ میں 64، گجرات میں 49، جھنگ میں 35، لیہ میں 33 اور جہلم میں 32 ملی میٹر ریکارڈ کی گئی۔
پی ڈی ایم اے کی فیکٹ شیٹ کے مطابق اس وقت تربیلا ڈیم میں پانی کی سطح 57 فیصد، منگلا ڈیم میں 38 فیصد جبکہ بھاکڑا، تھین اور پونگ ڈیموں میں پانی کی سطح 30 فیصد تک ہے۔
پی ڈی ایم اے کی جاری کردہ رپورٹ کے مطابق رواں سال مون سون بارشوں کے دوران پیش آنے والے مختلف حادثات میں 17 شہری جاں بحق اور 107 زخمی ہوئے ہیں۔ ان جانی نقصان میں کچے و بوسیدہ مکانات کی چھتیں گرنے سے 12، آسمانی بجلی گرنے سے 2 اور کرنٹ لگنے سے 3 اموات شامل ہیں۔ وزیر اعلیٰ پنجاب نے تمام زخمیوں کو بہترین طبی امداد فراہم کرنے اور متاثرہ خاندانوں کے مالی نقصانات کا فوری ازالہ کرنے کی سخت ہدایات جاری کی ہیں۔
وزیر اعلیٰ مریم نواز شریف کی ہدایت پر صوبے کے تمام متعلقہ شہروں کی سیف سٹی کیمروں کے ذریعے مسلسل نگرانی کی جا رہی ہے، جبکہ دریاؤں، ڈیموں، بیراجوں، برساتی نالوں اور نشیبی علاقوں کے گرد حفاظی انتظامات کو بھی فول پروف بنایا گیا ہے۔ وزیر اعلیٰ نے عوام سے پرزور اپیل کی ہے کہ وہ مون سون اور سیلابی صورتحال میں دریاؤں، نہروں اور برساتی نالوں کے قریب جانے یا نہانے کا خطرناک کھیل ہرگز نہ کھیلیں، اور کمزور و بوسیدہ عمارتوں یا چھتوں سے دور رہیں۔
وزیراعلیٰ مریم نواز کے بروقت اقدامات؛ ریکارڈ بارشوں کے باوجود پنجاب کے شہروں میں گھنٹوں کے اندر نکاسی آب مکمل
