شھدادپور رپورٹ اميرحيدر
جیئے سندھ محاذ ضلع سانگھڑ کی جانب سے اغوا شدہ معصوم بچوں، خصوصاً پریا کماری سمیت دیگر بچوں کی جلد بازیابی کے لیے احتجاجی ریلی اور مظاہرہ کیا گیا۔
احتجاج کی قیادت جیئے سندھ محاذ کے ضلعی رہنماؤں چیف ڈپٹی آرگنائزر منتھار چولیائی، وقار لغاری، ظہیر چانڈیو، شریف کلہوڑو، ذوالفقار نربان اور شان لغاری نے کی۔ ریلی میں سیاسی و سماجی کارکنوں سمیت بڑی تعداد میں شہریوں نے شرکت کی۔اس موقع پر مقررین نے خطاب کرتے ہوئے کہا کہ پریا کماری سمیت اغوا شدہ معصوم بچوں کی بازیابی میں تاخیر باعثِ تشویش ہے۔ انہوں نے مطالبہ کیا کہ قانون نافذ کرنے والے ادارے فوری کارروائی کرتے ہوئے اغوا شدہ بچوں کو بازیاب کرائیں اور ان کے اہل خانہ میں پائی جانے والی بے چینی کا خاتمہ کریں۔مظاہرین نے ہاتھوں میں پلے کارڈز اور بینرز اٹھا رکھے تھے اور حکومت کے خلاف نعرے بازی کرتے ہوئے مطالبہ کیا کہ بچوں کے تحفظ کو یقینی بنایا جائے اور اغوا میں ملوث عناصر کو قانون کے کٹہرے میں لایا جائے۔آخر میں رہنماؤں نے خبردار کیا کہ اگر اغوا شدہ بچوں کو جلد بازیاب نہ کیا گیا تو احتجاج کا دائرہ مزید وسیع کیا جائے گا