محبت پر پہرے: کچہری سے واپسی پر نو بیاہتا جوڑے کو گن پوائنٹ پر اغوا کرنے کی کوشش ناکام

شجاع آباد:شہر میں قانون شکنی کا ایک لرزہ خیز واقعہ پیش آیا، جہاں کچہری سے واپسی پر مسلح ملزمان نے گن پوائنٹ پر ایک نو بیاہتا جوڑے کو اغوا کر لیا۔ تاہم، تھانہ سٹی پولیس کی بروقت اور مستعد کارروائی نے دو زندگیاں بچا لیں۔
ذرائع کے مطابق، متاثرہ جوڑے نے تحفظ حاصل کرنے کے لیے شجاع آباد کچہری میں ہراسانی کے خلاف رٹ دائر کر رکھی تھی۔ عدالت سے واپسی پر جیسے ہی جوڑا کچھ فاصلے پر پہنچا تو پہلے سے گھات لگائے بیٹھے مسلح ملزمان نے انہیں گھیر لیا اور اسلحہ کے زور پر زبردستی گاڑی میں ڈال کر نامعلوم مقام کی جانب فرار ہو گئے۔
اغوا کی اطلاع ملتے ہی ایس ایچ او تھانہ سٹی عمران نیازی اپنی ٹیم کے ہمراہ فوری متحرک ہو گئے۔ پولیس نے علاقے کی ناکہ بندی کی اور ملزمان کا پیچھا کیا۔ پولیس کی جانب سے شدید دباؤ اور بروقت تعاقب کے نتیجے میں ملزمان مغوی جوڑے کو چھوڑ کر بھاگنے پر مجبور ہو گئے، جس پر پولیس نے جوڑے کو بحفاظت بازیاب کروا لیا۔
پولیس نے کارروائی کرتے ہوئے محمد شوکت، محمد ابراہیم اور محمد رمضان سمیت 7 سے 8 نامعلوم افراد کے خلاف دفعہ 365 کے تحت مقدمہ درج کر لیا ہے۔ ایس ایچ او عمران نیازی کا کہنا ہے کہ ملزمان کی گرفتاری کے لیے چھاپے مارے جا رہے ہیں اور جلد ہی تمام ملوث افراد قانون کی گرفت میں ہوں گے۔ اس کامیاب آپریشن پر اہل علاقہ نے پولیس کی کارکردگی کو سراہا ہے۔