صوابی (حق نوازخان)
ڈپٹی کمشنر صوابی ڈاکٹر طارق اللہ نے ضلع کے مختلف شعبوں میں نمایاں کارکردگی، بہادری اور کھیلوں میں شاندار کامیابیاں حاصل کرنے والے تین باصلاحیت نوجوانوں کو نقد انعامات اور توصیفی اسناد سے نواز دیا۔ تقریب کا مقصد نوجوانوں کی صلاحیتوں کو سراہنا اور انہیں مزید محنت و مثبت سرگرمیوں کی جانب راغب کرنا تھا۔تقریب کے دوران شاہ منصور کے رہائشی شاہ زیب کو ان کی غیر معمولی بہادری پر خصوصی اعزاز سے نوازا گیا۔ شاہ زیب نے گزشتہ روز تاریخی مقام ہنڈ میں دریا میں ڈوبنے والی ایک لڑکی کو اپنی جان خطرے میں ڈال کر بروقت بچایا تھا۔ اس انسان دوست اقدام کے اعتراف میں انہیں نقد انعام اور توصیفی سند پیش کی گئی۔ اس موقع پر ڈپٹی کمشنر نے کہا کہ شاہ زیب کی جرات انسانیت کی خدمت کی بہترین مثال ہے اور ایسے نوجوان معاشرے کا قیمتی سرمایہ ہیں۔اسی تقریب میں میاں کلے منصوری سے تعلق رکھنے والے قومی کراٹے کھلاڑی علی شیر کو نیشنل کراٹے چیمپئن شپ میں گولڈ میڈل جیت کر ضلع صوابی کا نام روشن کرنے پر نقد انعام اور توصیفی سند سے نوازا گیا۔ ڈپٹی کمشنر نے ان کی کامیابی کو نوجوان نسل کے لیے قابلِ تقلید قرار دیتے ہوئے کہا کہ کھیلوں کے میدان میں ایسی فتوحات پورے ضلع کے لیے باعثِ فخر ہیں۔مزید برآں شیوہ سے تعلق رکھنے والے نوجوان ایتھلیٹ محمد ضیاد کو لانگ ڈسٹنس دوڑ میں نمایاں کامیابیوں اور بہترین کارکردگی کے اعتراف میں نقد انعام اور توصیفی سرٹیفکیٹ دیا گیا۔ ڈپٹی کمشنر نے کہا کہ کھیلوں میں کامیاب نوجوان ملک و قوم کا قیمتی اثاثہ ہیں اور ان کی حوصلہ افزائی وقت کی اہم ضرورت ہے۔