ہنگورجہ (خصوصی رپورٹ فياض محسن سولنگي):
ہنگورجہ پولیس نے دعویٰ کیا ہے کہ سیٹھارجا لنک روڈ پر مبینہ پولیس مقابلے کے دوران ممتاز مارواڑی قتل کیس میں ملوث دو ملزمان کو زخمی حالت میں گرفتار کر لیا گیا۔ پولیس کے مطابق ملزمان کے قبضے سے ایک پستول، گولیاں اور دیگر سامان بھی برآمد کیا گیا ہے، جبکہ دونوں کے خلاف ہنگورجہ تھانے میں الگ مقدمات درج کر لیے گئے ہیں۔پولیس کے مطابق گرفتار زخمی ملزمان کی شناخت عرفان ملک اور مدثر بھٹی کے نام سے ہوئی ہے، جن کا تعلق پنجاب کے شہر گوجرانوالہ سے بتایا جاتا ہے۔ دونوں زخمی ملزمان کو طبی امداد کے لیے رورل ہیلتھ سینٹر ہنگورجہ منتقل کیا گیا۔ایس ایچ او ہنگورجہ اقبال نون نے صحافیوں سے گفتگو کرتے ہوئے دعویٰ کیا کہ گرفتار دونوں ملزمان حال ہی میں لعل بخش اسٹاپ کے قریب ڈکیتی کے دوران مزاحمت پر قتل کیے گئے محنت کش ممتاز مارواڑی کے قتل میں ملوث ہیں۔ ان کے مطابق ملزمان دیگر جرائم کے مقدمات میں بھی پولیس کو مطلوب تھے۔