سیالکوٹ سے مہر علی رضا کی رپورٹ
سیالکوٹ پنجاب سمال انڈسٹریز کارپوریشن کے فیکٹری ایریا آفس کے بعض ملازمین کی مبینہ غیر پیشہ ورانہ سرگرمیوں سے متعلق ویڈیوز سوشل میڈیا پر گردش کر رہی ہیں، جس کے بعد شہریوں نے معاملے کی شفاف تحقیقات کا مطالبہ کیا ہے۔
رپورٹ کے مطابق سوشل میڈیا پر گردش کرنے والی ویڈیوز کے حوالے سے دعویٰ کیا جا رہا ہے کہ فیکٹری ایریا آفس، سیالکوٹ کے بعض ملازمین سرکاری دفتر کے اندر غیر سنجیدہ سرگرمیوں میں ملوث نظر آتے ہیں۔ ان پر یہ بھی الزام ہے کہ وہ افسران کی سرکاری کرسیوں پر بیٹھ کر ٹک ٹاک ویڈیوز بناتے ہیں، جبکہ بعض ویڈیوز میں تاش کھیلنے اور دیگر غیر دفتری سرگرمیوں کے مناظر بھی دکھائی دیتے ہیں۔ رپورٹ میں مزید دعویٰ کیا گیا ہے کہ سرکاری وسائل کے مبینہ غلط استعمال، خصوصاً دفتری سہولیات کو غیر متعلقہ افراد کے لیے استعمال کرنے کے الزامات بھی سامنے آئے ہیں۔ شہریوں کا کہنا ہے کہ اگر یہ الزامات درست ہیں تو یہ سرکاری نظم و ضبط اور عوامی اعتماد کے لیے تشویشناک صورتحال ہے۔
متعلقہ حکام سے مطالبہ کیا جا رہا ہے کہ معاملے کی فوری، غیر جانبدارانہ اور شفاف انکوائری کرائی جائے۔ اگر الزامات ثابت ہوں تو ذمہ دار ملازمین کے خلاف محکمانہ قواعد اور قانون کے مطابق کارروائی عمل میں لائی جائے۔ اس خبر کے حوالے سے پنجاب سمال انڈسٹریز کارپوریشن یا متعلقہ حکام کا مؤقف موصول نہیں ہو سکا۔ مؤقف ملنے پر اسے بھی نشر کیا جائے گا۔