بوسان، جنوبی کوریا: ہنڈائی نے ‘بوسان آٹو شو 2026’ میں اپنی مقبول ترین سیڈان الینٹرا (جسے جنوبی کوریا میں ‘اوانتے’ کہا جاتا ہے) کی آٹھویں جنریشن کا باضابطہ طور پر نقاب کشائی کر دی ہے۔ نئی الینٹرا اپنی پیشرو ماڈلز کے مقابلے میں کہیں زیادہ جدید، کشادہ اور ٹیکنالوجی سے لیس ہے۔
’آرٹ آف اسٹیل‘ ڈیزائن کا نیا شاہکار
کمپنی نے اس نئی گاڑی کو ’آرٹ آف اسٹیل‘ (Art of Steel) ڈیزائن زبان کے تحت تیار کیا ہے۔ گاڑی کی ظاہری شکل پہلے سے کہیں زیادہ تیز اور جارحانہ ہے، جس میں ابھارے گئے وہیل آرچز، فلیش ڈور ہینڈلز اور ‘H’ شیپ کی دلکش فرنٹ اور رئیر لائٹس شامل ہیں۔ نئی الینٹرا کا سائز بھی بڑھا دیا گیا ہے؛ یہ اپنے پرانے ماڈل سے 55 ملی میٹر لمبی، 30 ملی میٹر چوڑی ہے، جبکہ اس کا وہیل بیس 30 ملی میٹر اضافے کے ساتھ 2,750 ملی میٹر تک پہنچ گیا ہے۔ ان تبدیلیاں کی بدولت گاڑی کا اندرونی حصہ اب ایک مڈ سائز سیڈان جتنی کشادگی فراہم کرتا ہے۔
جدید ٹیکنالوجی اور انٹیریئر
گاڑی کے اندر داخل ہوتے ہی جدید ’pleos‘ انفوٹینمنٹ سسٹم (اینڈرائیڈ بیسڈ) آپ کا استقبال کرتا ہے، جس میں 12.9 انچ کی ٹچ اسکرین معیاری جبکہ 14.6 انچ کا ڈسپلے آپشنل ہے۔ کیبن میں ڈوئل وائرلیس چارجنگ پیڈز، ایمبیئنٹ لائٹنگ اور کالم ماؤنٹڈ گیئر سلیکٹر دیا گیا ہے، جبکہ اہم فنکشنز کے لیے فزیکل بٹنز کی موجودگی کو برقرار رکھا گیا ہے تاکہ ڈرائیور آسانی سے انہیں استعمال کر سکے۔
انجن کی کارکردگی اور ہائبرڈ ماڈل
جنوبی کوریا کے مارکیٹ کے لیے اسے دو طاقتور آپشنز کے ساتھ پیش کیا گیا ہے:
2.0 لیٹر پیٹرول انجن: جو 147 ہارس پاور پیدا کرتا ہے (پرانے ماڈل کے مقابلے میں 25 ہارس پاور زیادہ)۔
1.6 لیٹر ہائبرڈ انجن: جو 155 ہارس پاور فراہم کرتا ہے۔
انوکھا ’اسٹے موڈ‘ (Stay Mode)
ہائبرڈ ویرینٹ میں جدید ترین ری جنریٹو بریکنگ ٹیکنالوجی کے ساتھ ساتھ ایک نیا ’اسٹی موڈ‘ متعارف کرایا گیا ہے۔ یہ فیچر گاڑی کے پارکنگ میں کھڑے ہونے کے دوران بیٹری کا استعمال کرتے ہوئے اے سی اور انفوٹینمنٹ سسٹم کو چلانے کی سہولت دیتا ہے، بالکل ایک الیکٹرک گاڑی کی طرح۔
ماہرین کا ماننا ہے کہ الینٹرا کی یہ نئی نسل اپنی جدید خصوصیات اور بہتر کارکردگی کی بدولت سیڈان مارکیٹ میں ایک نئی ہلچل مچا دے گی۔ کیا یہ نئی تبدیلی آپ کو متاثر کرنے کے لیے کافی ہے یا آپ الینٹرا میں مزید بہتری دیکھنا چاہتے تھے؟