ہنگورجہ:(بیورو چیف )
تقریباً 10 سے 12 سال قبل محمد عرس سولنگی ولد محمد صالح سولنگی، رہائشی ہالانی ضلع نوشہروفیروز، نے سہتا برادری کی خاتون سمیرا دختر حیات سہتو سے پسند کی شادی کی تھی۔ شادی کے بعد دونوں خاندانوں کے درمیان اختلافات پیدا ہوئے، تاہم برادری کے معززین اور علاقے کے بااثر افراد کی کوششوں سے فریقین میں صلح ہوگئی، جس کے بعد لڑکی کو بھی اس کے اہل خانہ نے قبول کر لیا اور معاملہ ختم ہوگیا۔ذرائع کے مطابق آج محمد عرس سولنگی اپنی اہلیہ سمیرا کے ہمراہ کسی ذاتی کام کے سلسلے میں ٹاؤن کمیٹی ہنگورجہ آیا تھا، جہاں مبینہ طور پر اس کے سالے فرحان ولد محمد حیات سہتو، رہائشی نولکھی، نے پرانی دشمنی اور پسند کی شادی کے تنازع پر اچانک اس پر فائرنگ کر دی۔فائرنگ کے نتیجے میں محمد عرس سولنگی گولیاں لگنے سے شدید زخمی ہوگیا، جبکہ ملزم واردات کے بعد موقع سے فرار ہونے میں کامیاب ہوگیا۔واقعے کی اطلاع ملتے ہی مقامی افراد اور پولیس نے زخمی کو فوری طور پر رورل ہیلتھ سینٹر () ہنگورجہ منتقل کیا، جہاں ابتدائی طبی امداد فراہم کرنے کے بعد تشویشناک حالت کے باعث اسے مزید علاج کے لیے سول اسپتال خیرپور ریفر کر دیا گیا۔
واقعے کے بعد علاقے میں خوف و ہراس پھیل گیا، جبکہ پولیس نے جائے وقوعہ پر پہنچ کر شواہد اکٹھے کر لیے ہیں اور واقعے کی تحقیقات شروع کر دی ہیں۔ پولیس کے مطابق ملزم کی گرفتاری کے لیے چھاپے مارے جا رہے ہیں، جبکہ مزید قانونی کارروائی جاری ہے۔