چنیوٹ (فرحان بلال سے)
ڈپٹی کمشنر عائشہ رضوان نے محرم الحرام کے دوران جلوسوں اور مجالس کے روٹس پر انتظامات کا جائزہ لینے کے لیے اسسٹنٹ کمشنرز اور متعلقہ محکموں کے افسران کے ساتھ اہم اجلاس کی صدارت کی۔ اجلاس میں سیکیورٹی، صفائی ستھرائی، نکاسی آب، پیچ ورک ،سٹریٹ لائٹس، ٹریفک مینجمنٹ، طبی سہولیات اور دیگر انتظامی امور کا تفصیلی جائزہ لیا گیا۔ڈپٹی کمشنر نے تمام اسسٹنٹ کمشنرز کو ہدایت کی کہ وہ اپنے اپنے علاقوں میں جلوس روٹس کا باقاعدگی سے معائنہ کریں اور انتظامات کی بروقت تکمیل کو یقینی بنائیں۔ انہوں نے متعلقہ محکموں کے افسران کو ہدایت کی کہ جلوسوں کے راستوں پر صفائی، پیچ ورک ، روشنی، پانی کی فراہمی اور دیگر سہولیات میں کسی قسم کی کمی نہیں ہونی چاہیے۔ڈپٹی کمشنر نے کہا کہ محرم الحرام کے دوران امن و امان کا قیام اور عزاداروں کو بہترین سہولیات کی فراہمی ضلعی انتظامیہ کی اولین ترجیح ہے۔ انہوں نے تمام اداروں کو باہمی رابطہ مزید مؤثر بنانے اور ہنگامی صورتحال سے نمٹنے کے لیے پیشگی انتظامات مکمل رکھنے کی ہدایت کی۔اجلاس میں افسران نے محرم الحرام کے سلسلہ میں کیے گئے انتظامات پر بریفنگ دی جبکہ ڈپٹی کمشنر نے تمام متعلقہ اداروں کو ذمہ داریاں احسن انداز میں سرانجام دینے اور جلوسوں کے پرامن انعقاد کے لیے بھرپور اقدامات یقینی بنانے کی تاکید کی