سی سی ڈی سربراہ ایڈیشنل آئی جی پنجاب سہیل ظفر چٹھہ کا دورہ ڈھڈیال، ننھی ہانیہ کی قبر پر فاتحہ خوانی ، اہل خانہ سے اظہارتعزیت

چکوال :(رپورٹ منور حسین)
کرائم کنٹرول ڈیپارٹمنٹ (سی سی ڈی) پنجاب کے سربراہ ایڈیشنل آئی جی سہیل ظفر چھٹہ ڈھڈیال پہنچ گئے ان کے ہمراہ ڈی پی او چکوال کاشف ذولفقار بھی تھے جہاں انہوں نے خمینی چوک سانحے میں جاں بحق ہونے والی کمسن ہانیہ عدیل کی قبر پر حاضری دی اور فاتحہ خوانی کی۔

بعد ازاں سہیل ظفر چھٹہ مقتولہ کے گھر گئے، جہاں انہوں نے اہلخانہ سے ملاقات کی، ان سے اظہارِ تعزیت کیا اور گہرے دکھ اور افسوس کا اظہار کیا۔ اس موقع پر انہوں نے ورثا کو یقین دلایا کہ واقعے کی مکمل، شفاف اور غیر جانبدارانہ تحقیقات کی جائیں گی اور انصاف کی فراہمی ہر صورت یقینی بنائی جائے گی۔

سی سی ڈی سربراہ کا کہنا تھا کہ قانون سے بالاتر کوئی نہیں اور تحقیقات میں سامنے آنے والے تمام حقائق کی روشنی میں ذمہ داروں کے خلاف قانون کے مطابق کارروائی عمل میں لائی جائے گی۔ مقتولہ کے اہلخانہ نے اعلیٰ حکام کی آمد کو خوش آئند قرار دیتے ہوئے مطالبہ کیا کہ واقعے میں ملوث تمام عناصر کو قانون کے مطابق سخت سزا دی جائے تاکہ متاثرہ خاندان کو انصاف مل سکے اور مستقبل میں ایسے افسوسناک واقعات کی روک تھام ممکن بنائی جا سکے۔ واضح رہے کہ ہانیہ عدیل کی ہلاکت کے بعد یہ واقعہ ملک بھر میں توجہ کا مرکز بنا ہوا ہے، جبکہ عوامی حلقوں کی جانب سے بھی شفاف تحقیقات اور ذمہ داروں کے تعین کا مطالبہ کیا جا رہا ہے۔