دیر بالا(ریاض ابوالخیل بیورو چیف)
دیر بالا: ڈسٹرکٹ پولیس آفیسر دیر بالا اسلم نواز نے سیاحوں اور عوامی شکایات کا فوری نوٹس لیتے ہوئے انچارج ٹریفک بلال عنایت کو زائد کرایہ وصول کرنے والے ڈرائیوروں کے خلاف مؤثر کارروائی کے احکامات جاری کر دیے۔ڈی پی او دیر بالا اسلم نواز نے کہا کہ سیاحوں کی سہولت، تحفظ اور رہنمائی دیر بالا پولیس کی اولین ترجیحات میں شامل ہیں۔ انہوں نے تمام پولیس اہلکاروں کو ہدایت کی کہ وہ خوش اخلاقی کے ساتھ عوام اور سیاحوں کی ہر ممکن مدد کو یقینی بنائیں۔انہوں نے مزید کہا کہ دیر بالا پولیس اندرون و بیرون ملک سے آنے والے سیاحوں کی خدمت اور حفاظت کے لیے ہمہ وقت کوشاں ہے۔ دیر بالا کے حسین اور قدرتی سیاحتی مقامات سیاحوں کے لیے پرکشش ہیں، جہاں وہ بلاخوف و خطر قدرتی حسن اور خوشگوار موسم سے لطف اندوز ہو سکتے ہیں۔دیر بالا کے سرسبز و شاداب پہاڑوں اور دلکش سیاحتی مقامات کی سیر کے لیے آنے والے سیاح خیبرپختونخوا پولیس، بالخصوص دیر بالا پولیس کی جانب سے فراہم کی جانے والی سہولیات اور خدمات کے بارے میں اپنے مثبت تاثرات کا اظہار کر رہے ہیں۔*