لاہور:صوبائی ڈیزاسٹر مینجمنٹ اتھارٹی (پی ڈی ایم اے) نے پنجاب بھر میں آندھی، بارشوں اور ژالہ باری کے پیش نظر الرٹ جاری کر دیا ہے۔
ترجمان پی ڈی ایم اے کے مطابق 11 سے 13 جون کے دوران صوبے کے بیشتر اضلاع میں بارش کا امکان ہے، جبکہ بعض علاقوں میں تیز ہواؤں اور ژالہ باری کی بھی پیش گوئی کی گئی ہے۔
محکمہ کے مطابق لاہور، سیالکوٹ، فیصل آباد، جھنگ اور ان کے گردونواح میں بارشوں کے امکانات زیادہ ہیں۔ ممکنہ موسمی صورتحال کے پیش نظر صوبہ بھر کے کمشنرز اور ڈپٹی کمشنرز کو الرٹ جاری کر دیا گیا ہے تاکہ کسی بھی ہنگامی صورتحال سے مؤثر انداز میں نمٹا جا سکے۔ڈی جی پی ڈی ایم اے عمر جاوید نے شہریوں کو احتیاطی تدابیر اختیار کرنے کی ہدایت کرتے ہوئے کہا ہے کہ آسمانی بجلی کی صورت میں محفوظ مقامات پر رہیں اور گرج چمک کے دوران کھلے مقامات پر جانے سے گریز کریں۔ انہوں نے مزید کہا کہ گردوغبار اور تیز آندھی کے دوران بھی شہری غیر ضروری نقل و حرکت سے اجتناب کریں۔
ڈی جی پی ڈی ایم اے نے کسانوں کو مشورہ دیا ہے کہ وہ موسمی صورتحال کو مدنظر رکھتے ہوئے اپنی فصلوں اور زرعی سرگرمیوں کے تحفظ کے لیے پیشگی اقدامات کریں۔ اسی طرح شمالی علاقہ جات کا سفر کرنے والے سیاحوں کو بھی احتیاطی تدابیر اختیار کرنے اور موسمی حالات سے باخبر رہنے کی ہدایت کی گئی ہے۔
پی ڈی ایم اے نے عوام سے اپیل کی ہے کہ وہ سرکاری ہدایات پر عمل کریں اور کسی بھی ہنگامی صورتحال میں متعلقہ اداروں سے رابطہ کریں۔
