راولپنڈی: بحرین نیشنل گارڈ کے کمانڈر جنرل شیخ محمد بن عیسیٰ بن سلمان آل خلیفہ نے آج جنرل ہیڈکوارٹرز (جی ایچ کیو) راولپنڈی میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے ملاقات کی ہے۔
ملاقات کے دوران باہمی دلچسپی کے امور، علاقائی سکیورٹی صورتحال اور دوطرفہ دفاعی و سکیورٹی تعاون کو مزید فروغ دینے کے امکانات پر تبادلہ خیال کیا گیا۔
آئی ایس پی آر کی جانب سے جاری بیان کے مطابق دونوں شخصیات نے پاکستان اور بحرین کے درمیان دیرینہ برادرانہ تعلقات پر اطمینان کا اظہار کرتے ہوئے عسکری سطح پر تعاون کو مزید مضبوط بنانے کی اہمیت پر زور دیا۔
اس سے قبل بحرین نیشنل گارڈ کے کمانڈر نے علیحدہ علیحدہ چیف آف دی نیول اسٹاف ایڈمرل نوید اشرف اور چیف آف دی ایئر اسٹاف ایئر چیف مارشل ظہیر احمد بابر سدھو سے بھی ملاقاتیں کیں۔
نیول ہیڈکوارٹرز میں ہونے والی ملاقات میں دوطرفہ دفاعی تعاون اور علاقائی سکیورٹی صورتحال پر توجہ مرکوز رہی۔ بحرینی کمانڈر نے خطے میں مشترکہ بحری سکیورٹی کے فروغ میں پاک بحریہ کے تعمیری کردار کو سراہتے ہوئے اسے علاقائی بحری سکیورٹی کے استحکام میں اہم کردار قرار دیا۔
ایئر ہیڈکوارٹرز میں ہونے والی ملاقات کے دوران چیف آف دی ایئر اسٹاف نے پاک فضائیہ کی جدیدکاری کی کوششوں، صلاحیتوں میں اضافے، بنیادی ڈھانچے کی ترقی، مقامی سطح پر تیاری اور جدید تربیتی اصلاحات پر روشنی ڈالی۔ مذاکرات میں ڈرونز، مصنوعی ذہانت، خودکار نظام، جدید سینسرز اور ڈیجیٹل جدت سمیت ابھرتی ہوئی دفاعی ٹیکنالوجیز، فضائی دفاع کو درپیش نئے چیلنجز اور مربوط دفاعی نظام پر بھی تبادلہ خیال کیا گیا۔
بحرینی کمانڈر نے پاکستان کی مسلح افواج کی پیشہ ورانہ صلاحیتوں، آپریشنل تیاری اور علاقائی امن و استحکام کے لیے خدمات کو سراہا۔ انہوں نے پاکستان کی مسلح افواج کی جدیدکاری اور مقامی دفاعی صلاحیتوں کی بھی تعریف کی اور تربیت، ابھرتی ہوئی ٹیکنالوجیز اور استعداد کار میں اضافے کے شعبوں میں مزید تعاون میں دلچسپی کا اظہار کیا۔
یہ دورہ پاکستان اور بحرین کے درمیان مضبوط اور دیرپا دفاعی شراکت داری کا مظہر ہے اور توقع ہے کہ اس سے دونوں برادر ممالک کے باہمی مفاد کے لیے عسکری تعاون کو مزید فروغ ملے گا۔