اسلام آباد: نیشنل الیکٹرک پاور ریگولیٹری اتھارٹی (نیپرا) نے اپریل 2026 کی فیول پرائس ایڈجسٹمنٹ کی مد میں بجلی کی قیمت میں ایک روپے 19 پیسے فی یونٹ اضافے کا نوٹیفکیشن جاری کر دیا ہے۔
نیپرا کے مطابق بجلی کی قیمت میں ہونے والا یہ اضافہ جون 2026 کے بلوں میں صارفین سے وصول کیا جائے گا۔ یہ فیصلہ کے-الیکٹرک اور سابق واپڈا کی تمام تقسیم کار کمپنیوں (ڈسکوز) کے صارفین پر لاگو ہوگا۔
جاری کردہ نوٹیفکیشن میں بتایا گیا ہے کہ قومی اوسط فیول چارج کمپوننٹ 8 روپے 20 پیسے فی یونٹ مقرر کیا گیا تھا، جبکہ اپریل 2026 کے دوران قومی اوسط فیول لاگت 9 روپے 40 پیسے فی یونٹ ریکارڈ کی گئی۔ اس فرق کی بنیاد پر فیول پرائس ایڈجسٹمنٹ کے تحت ایک روپے 19 پیسے فی یونٹ اضافی وصولی کی منظوری دی گئی ہے۔
نیپرا نے واضح کیا ہے کہ لائف لائن صارفین، پری پیڈ صارفین اور الیکٹرک وہیکل چارجنگ اسٹیشنز اس اضافی چارج سے مستثنیٰ ہوں گے۔
نوٹیفکیشن کے مطابق اپریل 2026 میں استعمال ہونے والے یونٹس کی بنیاد پر فیول ایڈجسٹمنٹ وصول کی جائے گی۔ اگر جون کے بل پہلے ہی جاری ہو چکے ہوں تو یہ اضافی رقم آئندہ بلوں میں شامل کی جا سکتی ہے۔
توانائی شعبے کے ماہرین کے مطابق فیول لاگت میں اتار چڑھاؤ کے باعث فیول پرائس ایڈجسٹمنٹ کا اطلاق بجلی کے نرخوں پر براہ راست اثر انداز ہوتا ہے، جس کا مقصد بجلی کی پیداواری لاگت اور وصولیوں میں توازن برقرار رکھنا ہے۔
