بہاولنگر سے راشد ڈھڈی کی رپورٹ
محرم الحرام کے پرامن انعقاد اور سیکیورٹی انتظامات کا جائزہ لینے کے لیے ڈی پی او بہاولنگر محمد عمران اور ڈپٹی کمشنر ذوالفقار احمد بھون نے چشتیاں شہر کا دورہ کیا۔ دونوں افسران نے جلوسوں اور مجالس کے روٹس کا معائنہ کرتے ہوئے سیکیورٹی، صفائی، اسٹریٹ لائٹس اور تجاوزات کے خاتمے سے متعلق متعلقہ اداروں کو ضروری ہدایات جاری کیں۔ڈی پی او محمد عمران نے کہا کہ محرم الحرام کے دوران امن و امان کا قیام اولین ترجیح ہے اور سیکیورٹی پر کسی قسم کا سمجھوتہ نہیں کیا جائے گا۔ حساس مقامات پر سی سی ٹی وی مانیٹرنگ کو یقینی بنانے جبکہ قانون شکنی اور فرقہ واریت پھیلانے والے عناصر کے خلاف سخت کارروائی کے احکامات بھی جاری کیے گئے۔ ڈپٹی کمشنر ذوالفقار احمد بھون نے جلوس روٹس سے تجاوزات کے خاتمے، بجلی کی لٹکتی تاروں کی درستگی اور دیگر انتظامات بروقت مکمل کرنے کی ہدایت کرتے ہوئے کہا کہ تمام متعلقہ محکمے محرم الحرام کے دوران عوام کو بہترین سہولیات فراہم کریں گے۔