ٹانک( بیورورپورٹ )
ملائشیا کے دارالحکومت کولالمپور میں منعقد ہونے والے 123ویں ماسٹر تھائیکوانڈو کورس کوکی وان (کوریا) میں پاکستان تائیکوانڈو فیڈریشن کے 2 کھلاڑیوں نے کامیابی کے ساتھ کورس مکمل کر کے ملک کا نام روشن کر دیا۔ اس بین الاقوامی کورس میں چائینہ، ویتنام، انڈونیشیا، ملائشیا، ہندوستان، پاکستان، کوریا، ہانگ کانگ اور سنگاپور سمیت مختلف ممالک کے کھلاڑیوں اور کوچز نے شرکت کی۔پاکستان کی نمائندگی ازمری وزیرستان کلب سے تعلق رکھنے والے معروف تھائیکوانڈو کوچ فاروق محسود جبکہ خبیب فاؤنڈیشن اسلام آباد کے حسین انجم نے کی۔ دونوں کھلاڑیوں نے کامیابی سے کورس مکمل کرتے ہوئے اپنا نام انٹرنیشنل ماسٹرز میں درج کرا لیا، جو پاکستان اور جنوبی وزیرستان کے لیے ایک بڑا اعزاز قرار دیا جا رہا ہے۔اس موقع پر فاروق محسود کا کہنا تھا کہ عالمی سطح پر پاکستان اور جنوبی وزیرستان کی نمائندگی کرنا ان کے لیے باعثِ فخر ہے۔علاقے کے عوام اور کھیلوں سے وابستہ حلقوں نے فاروق محسود اور حسین انجم کی کامیابی کو سراہتے ہوئے اسے جنوبی وزیرستان کے نوجوانوں کے لیے حوصلہ افزا قرار دیا ہے۔