نوشہرو فیروز: بیورو چیف سونو کلہوژو
جئے سندھ قومی محاذ (شہید بشیر خان قریشی گروپ) کے چیئرمین ڈاکٹر نیاز کالانی، سینئر وائس چیئرمین آصف بالادی، جنرل سیکریٹری پنہل ساریو اور دیگر رہنماؤں نے مشترکہ پریس کانفرنس سے خطاب کیا۔صحافیوں کے ایک سوال کے جواب میں نوشہرو فیروز کے رہائشی اور ایکسائز کے ڈپٹی ڈائریکٹر سعید میمن کی 15 روز گزرنے کے باوجود بازیابی نہ ہونے پر ڈاکٹر نیاز کالانی نے کہا کہ سعید میمن ہمارے قومی دوست ہیں اور قومی سوچ رکھنے والے شخص ہیں۔ ان کا پورا خاندان بھی قومی فکر رکھتا ہے۔ ہمیں ان کی گمشدگی پر شدید افسوس ہے۔ سعید میمن ہمارے پڑوسی صوبے بلوچستان میں دوستوں کے علاقے سے اغوا ہوئے ہیں۔ ہم میڈیا کے ذریعے اپیل کرتے ہیں کہ ہمارے قومی دوست کو کسی قسم کی تکلیف پہنچائے بغیر فوری طور پر آزاد کیا جائے جئے سندھ قومی محاذ کے کارکن مختلف مقامات پر سعید میمن کے اہل خانہ، دوستوں اور رشتہ داروں سے مسلسل رابطے میں ہیں۔ کل شام 5 بجے سول سوسائٹی کی جانب سے حیدرآباد پریس کلب کے سامنے احتجاجی مظاہرہ کیا جائے گا، جس میں ہماری جماعت کی نمائندگی سینئر وائس چیئرمین آصف بالادی کریں گے۔ ہم تمام سیاسی و سماجی حلقوں سے اپیل کرتے ہیں کہ اس معاملے میں تعاون کریں اور ہمارے قومی دوست کی محفوظ رہائی کے لیے کردار ادا کریں۔
امن و امان کی صورتحال اور قوم پرست کارکنوں کو دھمکیاں دیے جانے اور لاپتا کیے جانے کے سوال پر انہوں نے کہا کہ جو قوتیں دھمکیاں دیتی ہیں اور طاقت کا استعمال کرتی ہیں، وہ اپنا رویہ جاری رکھیں، مگر ہم اپنی جدوجہد سے پیچھے نہیں ہٹیں گے۔ ہمارے کارکن قربانیاں دینے کے لیے تیار ہیں اور سندھ کے حقوق کے لیے جدوجہد جاری رکھیں گے۔ انہوں نے کہا کہ امن و امان برقرار رکھنا حکومت کی ذمہ داری ہے، لیکن گزشتہ 18 برسوں سے اقتدار ایسے لوگوں کے ہاتھ میں ہے جن کی دلچسپی عوامی مسائل حل کرنے کے بجائے اپنے مفادات کے تحفظ میں ہے۔ عوام کی خدمت کے بجائے ہر سطح پر کرپشن اور لوٹ مار کو فروغ دیا گیا ہے۔