یونیورسٹی آف چکوال میں اسرائیلی پرچم تنازعہ، انتظامیہ اور ایم ایس او کے درمیان مذاکرات

چکوال (بیورو چیف جلیل نقوی): یونیورسٹی آف چکوال میں شعبہ انٹرنیشنل ریلیشنز کے زیر اہتمام منعقدہ اسٹریٹجک کانفرنس کے دوران مبینہ طور پر اسرائیلی پرچم لہرانے کے معاملے پر پیدا ہونے والی صورتحال کے حوالے سے مسلم سٹوڈنٹس آرگنائزیشن (ایم ایس او) کے وفد نے وائس چانسلر سے تفصیلی ملاقات کی۔وفد کی قیادت ناظم ایم ایس او شمالی پنجاب شرجیل احسن نے کی، جبکہ وفد میں ناظم چکوال احسان مجید، ممبر ضلعی امن کمیٹی کیپٹن غلام شبیر اور دیگر نمائندگان شامل تھے۔ملاقات کے دوران وفد نے واقعے پر اپنے تحفظات سے آگاہ کرتے ہوئے اس معاملے کی شفاف تحقیقات کا مطالبہ کیا۔ وائس چانسلر نے صورتحال پر تشویش کا اظہار کرتے ہوئے فوری طور پر انکوائری کمیٹی تشکیل دینے اور 48 گھنٹوں میں رپورٹ طلب کرنے کا اعلان کیا۔یونیورسٹی انتظامیہ کے مطابق انکوائری بورڈ کو مکمل اختیارات دیے گئے ہیں تاکہ ذمہ دار عناصر کا تعین کر کے مناسب کارروائی عمل میں لائی جا سکے۔ اس موقع پر وائس چانسلر نے یقین دہانی کروائی کہ آئندہ ایسے واقعات کی روک تھام کیلئے مؤثر اقدامات کیے جائیں گے۔بعد ازاں ایم ایس او وفد کی رجسٹرار یونیورسٹی سے بھی ملاقات ہوئی، جس میں معاملے کے مختلف پہلوؤں اور آئندہ لائحہ عمل پر گفتگو کی گئی۔