ہالا رپورٹ عامر انڑ
برصغیر کی عظیم روحانی شخصیت حضرت غوث الحق مخدوم سرور نوح کا 449 واں سالانہ عرس مبارک نہایت عقیدت، احترام اور روحانی جوش و جذبے کے ساتھ منایا جا رہا ہے۔ درگاہ غوث الحق حضرت مخدوم سرور نوح کے گدی نشین، سروری جماعت کے روحانی پیشوا اور رکنِ قومی اسمبلی مخدوم جمیل الزمان جبکہ صوبائی وزیر خوراک مخدوم محبوب الزمان نے مزار پر چادر چڑھا کر عرس تقریبات کا باقاعدہ آغاز کیا۔عرس مبارک کے موقع پر سندھ سمیت ملک بھر سے سروری جماعت کے ہزاروں عقیدت مند اور زائرین درگاہ پر پہنچے۔ اس موقع پر مخدوم جمیل الزمان نے خطاب کرتے ہوئے کہا کہ اپنی اولاد کو قرآن پاک کی تعلیم سے آراستہ کریں۔ انہوں نے کہا کہ حضرت غوث الحق مخدوم سرور نوح کے پیغام اور ان کی دکھائی ہوئی راہ پر چل کر دنیا و آخرت میں کامیابی حاصل کی جا سکتی ہے۔مخدوم جمیل الزمان نے ایران کی فتح اور پاکستان کی فوج کے لیے خصوصی دعا بھی کی۔ دوسری جانب عرس مبارک کے موقع پر درگاہ سرور نوح سمیت پورے شہر کو رنگ برنگی روشنیوں سے سجایا گیا ہے، جبکہ میونسپل انتظامیہ کی جانب سے صفائی ستھرائی کے انتظامات مکمل کرتے ہوئے مختلف مقامات پر پانی کی سبیلیں بھی قائم کی گئی ہیں۔پولیس انتظامیہ کی جانب سے سیکیورٹی کے سخت انتظامات کیے گئے ہیں