میلسی:سعودیہ پلٹ شخص نے گھریلو جھگڑے پر بیوی اور تین کمسن بچوں کو موت کے گھاٹ اتار دیا

میلسی(تحصیل رپورٹر ) سجاد سحر تھانہ صدر میلسی کی حدود موضع فتح پور میں دل دہلا دینے والا افسوسناک واقعہ پیش آیا جہاں ایک شخص نے مبینہ طور پر اپنی بیوی اور تین معصوم بیٹوں کو قتل کردیا۔ اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر تحقیقات کا آغاز کر دیا۔ذرائع کے مطابق سجاد نامی شخص نے گھریلو جھگڑے پر طیش میں آکر کلہاڑی کے وار کرکے اپنی بیوی اور تین کمسن بچوں کو موت کے گھاٹ اتار دیا۔ واقعے کے بعد علاقے میں خوف و ہراس پھیل گیا جبکہ اہل علاقہ کی بڑی تعداد موقع پر جمع ہوگئی۔بتایا جاتا ہے کہ ملزم کچھ روز قبل ہی سعودی عرب سے واپس آیا تھا۔ بعض مقامی افراد کا کہنا ہے کہ وہ ذہنی دباؤ یا نفسیاتی مسائل کا شکار تھا اور مختلف پیروں کے پاس بھی آتا جاتا تھا، تاہم پولیس نے اس حوالے سے کوئی حتمی مؤقف اختیار نہیں کیا۔پولیس نے چاروں نعشوں کو تحویل میں لے کر پوسٹ مارٹم کیلئے منتقل کر دیا ہے جبکہ جائے وقوعہ سے شواہد اکٹھے کیے جا رہے ہیں۔ پولیس حکام کے مطابق واقعے کے مختلف پہلوؤں سے تحقیقات جاری ہیں اور مزید حقائق مکمل تفتیش کے بعد سامنے آئیں گے۔