اے این ایف کی تعلیمی اداروں کے اطراف اور مختلف شہروں میں منشیات اسمگلنگ کے خلاف بڑی کارروائیاں۔

شیخوپورہ (رپورٹ اسامہ طفیل) ترجمان انسداد منشیات فورس کے مطابق تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف بھرپور کریک ڈاؤن کرتے ہوئے 8 کارروائیوں کے دوران 10 ملزمان کو گرفتار کر لیا۔کارروائیوں کے دوران مجموعی طور پر 70 لاکھ روپے سے زائد مالیت کی 52.67 کلوگرام منشیات برآمد کی گئی۔اسلام آباد کے سنٹرل پارک ڈی ایچ اے کے قریب تین گاڑیوں سے 625 گرام چرس اور 178 گرام ویڈ برآمد ہوئی، جس کے نتیجے میں 5 ملزمان کو گرفتار کیا گیا۔کراچی کے فاروق اعظم چوک کے قریب رکشہ سے 300 گرام آئس برآمد کر کے ایک ملزم کو گرفتار کیا گیا۔گرفتار ملزمان نے دورانِ تفتیش تعلیمی اداروں کے طلبہ کو منشیات فروخت کرنے کا اعتراف کیا۔اسلام آباد ہوائی اڈے پر بحرین جانے والے مسافر کے بیگ سے 1.030 کلوگرام آئس برآمد کر کے ملزم کو گرفتار کیا گیا۔ اسی ہوائی اڈے پر ایک اور کارروائی میں بھی بحرین جانے والے مسافر کے بیگ سے 1.032 کلوگرام آئس برآمد ہوئی۔لاہور میں کوریئر دفتر کے ذریعے دبئی بھیجے جانے والے پارسل میں کتاب کے اندر چھپائی گئی 805 گرام کینابینوئڈز برآمد کی گئیں۔جی ٹی روڈ اٹک کے قریب ٹرک سے 7.7 کلوگرام چرس برآمد ہوئی، جس پر دو ملزمان کو گرفتار کیا گیا۔سرگل دالبندین کے قریب جھاڑیوں میں چھپائی گئی 35 کلوگرام افیون برآمد کی گئی پشاور کے کارخانو مارکیٹ میں واقع کوریئر دفتر سے تین پارسلوں میں سولر لائٹس کے اندر چھپائی گئی 6 کلوگرام آئس برآمد ہوئی۔تمام مقدمات انسداد منشیات ایکٹ انیس سو ستانوے کے تحت درج کر کے مزید تفتیش شروع کر دی گئی ہے۔