مری(راشد مغل سے) ٹریفک قوانین پر سختی سے عملدرآمد کسی بھی مہذب معاشرے کی پہچان ہوتا ہے، جبکہ پہاڑی سیاحتی علاقے مری میں اس ذمہ داری کی اہمیت مزید بڑھ جاتی ہے۔ حسنین شاہ کی نگرانی میں ٹریفک پولیس مری کی جانب سے مال روڈ اور گرد و نواح میں سکول وینز اور سپلائی والی گاڑیوں کے خلاف کارروائیاں جاری ہیں، جنہیں شہری حلقوں کی جانب سے سراہا جا رہا ہے۔ٹریفک پولیس کی جانب سے سکول وینز اور سپلائی گاڑیوں کو باقاعدہ ڈسپلن میں لانے کے لیے ڈرائیورز کے ڈرائیونگ لائسنس، روٹ پرمٹ اور دیگر ضروری کاغذات کی روزانہ کی بنیاد پر جانچ کی جا رہی ہے تاکہ کسی بھی غیر قانونی یا غیر ذمہ دارانہ عمل کی روک تھام ممکن بنائی جا سکے۔اس کے علاوہ غیر واضح، جعلی یا نظر نہ آنے والی نمبر پلیٹس رکھنے والی گاڑیوں کے خلاف بھی سخت کارروائی عمل میں لائی جا رہی ہے۔ ٹریفک پولیس حکام کے مطابق قانون سب کے لیے برابر ہے اور کسی کو بھی خلاف ورزی کی اجازت نہیں دی جائے گی۔خصوصی طور پر سکول وینز کے باہر لٹکے ہوئے بچوں کے بیگز کو خطرناک قرار دیتے ہوئے ان کے خلاف بھی ایکشن لیا جا رہا ہے، کیونکہ یہ کسی بھی وقت پیدل چلنے والوں کے لیے حادثے کا سبب بن سکتے ہیں۔ اسی طرح سپلائی گاڑیوں کے باہر لٹکا ہوا سامان بھی ٹریفک کی روانی متاثر کرنے کے ساتھ شہریوں کی جان کے لیے خطرہ بن سکتا ہے، جس پر ٹریفک پولیس خصوصی توجہ دے رہی ہے۔شہریوں اور والدین کی بڑی تعداد نے ٹریفک پولیس مری کی ان کارروائیوں کو خوش آئند قرار دیتے ہوئے کہا ہے کہ ایسے اقدامات سے نہ صرف ٹریفک نظام بہتر ہوگا بلکہ حادثات میں بھی واضح کمی آئے گی۔ عوام کا کہنا ہے کہ قانون پر عملدرآمد ہی محفوظ اور منظم ٹریفک نظام کی ضمانت ہے۔
ٹریفک پولیس مری کا کریک ڈاؤن، سکول وینز اور سپلائی گاڑیوں کی سخت چیکنگ جاری
