لاہور میں آٹے کے نرخ بھی اوپر چلے گئے ہیں۔ شہریوں کے لئے دو وقت کی روٹی کا حصول مشکل ہوگیا، جبکہ نانبائی ایسوسی ایشن نے بھی روٹی کی قیمت میں اضافے کا مطالبہ کردیا،
تفصیلات کے مطابق گندم اور آٹے کی قیمتوں میں مسلسل اضافے کا رجحان برقرار ہے اور 20 کلو آٹے کا تھیلا مزید 50 روپے مہنگا ہو گیا ہے۔کریانہ مرچنٹ ایسوسی ایشن کے مطابق فلور ملز کی جانب سے 20 کلو آٹے کا تھیلا 2100 روپے میں فراہم کیا جا رہا ہے، جبکہ یہی تھیلا مارکیٹ میں صارفین کو 2150 روپے تک فروخت ہو رہا ہے۔جبکہ بازار میں 15 کلو آٹے کا تھیلا 1600 سے 1700 روپے کے درمیان فروخت کیا جا رہا ہے۔
لاہور میں گندم کی فی من قیمت بڑھ کر تقریباً 4 ہزار روپے تک جا پہنچی ہے، جس کے براہ راست اثرات آٹے کی قیمتوں پر مرتب ہو رہے ہیں اور مہنگائی کا دباؤ مزید بڑھنے کا خدشہ ظاہر کیا جا رہا ہے۔
