لاہور( ملک ظہیر کی رپورٹ)
اقبال ٹائون پولیس نے پیشہ ورانہ حکمت عملی اور جدید ٹیکنالوجی کا استعمال کرتے ہوئے سرِراہ خاتون سے پرس چھیننے کی واردات میں ملوث گینگ کو ٹریس کر کے مرکزی ملزم کو گرفتار کر لیا۔پولیس کے مطابق دو موٹرسائیکل سوار ملزمان واردات کے بعد فرار ہو گئے تھے تاہم 15 کال موصول ہوتے ہی پولیس نے فوری رسپانس دیتے ہوئے تفتیش شروع کر دی ۔ پولیس ٹیموں نے مختلف مقامات کی سی سی ٹی وی فوٹیج حاصل کر کے ملزمان کی شناخت ممکن بنائی۔پولیس کے مطابق پولیس نے صرف 36 گھنٹوں کے قلیل وقت میں کارروائی کرتے ہوئے مرکزی ملزم عبداللہ ولد انور کو گرفتار کر لیا، جو سبزہ زار کا رہائشی ہے۔ ملزم کے قبضے سے واردات میں چھینا گیا پرس، موبائل فون اور نقدی رقم بھی برآمد کر لی گئی۔ دورانِ تفتیش گرفتار ملزم نے مزید تین اسنیچنگ وارداتوں میں ملوث ہونے کا انکشاف کیا۔ پولیس کے مطابق ملزم نے ایک واردات تھانہ سبزہ زار جبکہ دو وارداتیں تھانہ اقبال ٹان کی حدود میں کرنے کا اعتراف کیا ہے۔ ڈی آئی جی آپریشنز کا کہنا ہے کہ فرار ساتھی ملزم قمر کی گرفتاری کیلئے مختلف مقامات پر چھاپے مارے جا رہے ہیں اور جلد اسے بھی قانون کی گرفت میں لے لیا جائے گا۔