سکھر (بیورو چیف محمد قاسم ملک سے)
ضلع انتظامیہ سکھر کی جانب سے "معرکہ حق” کی کامیابی کی یاد اور افواجِ پاکستان کی بہادری کو خراجِ تحسین پیش کرنے کے لیے ریلی کا انعقاد کیا گیا، ریلی ایڈیشنل ڈپٹی کمشنر سکھر-ون تنویر احمد، ایڈیشنل ڈپٹی کمشنر ٹو ماجد علی ماکو اور ڈپٹی میئر سکھر ڈاکٹر ارشد علی مغل کی سربراہی میں میونسپل اسٹیڈیم سے پریس کلب سکھر تک نکالی گئی۔ریلی میں مختلف سرکاری محکموں کے افسران، بلدیاتی نمائندوں، شہریوں، طلبا اور اساتذہ نے بھرپور شرکت کی۔ شرکا نے قومی پرچم اور مختلف نعروں پر مبنی پلے کارڈز اور بینرز تھام رکھے تھے۔ اس موقع پر "پاک فوج زندہ باد، پاکستان پائندہ باد” کے پرجوش نعرے فضا میں گونج اٹھے۔ریلی کے مقررین نے شہدا کو خراجِ عقیدت اور غازیوں کو خراجِ تحسین پیش کیا۔ ریلی کو خطاب کرتے ہوئے ایڈیشنل ڈپٹی کمشنر- ون تنویر احمد کا کہنا تھا کہ "معرکہ حق میں افواجِ پاکستان نے اپنی بہادری، شجاعت اور بصیرت سے دنیا بھر میں پاکستان کا نام روشن کیا اور یہ بھارتی جارحیت کا فیصلہ کن جواب تھا۔۔اے ڈی سی ٹو ماجد علی ماکو نے کہا کہ معرکہ حق دشمن کے منہ پر زوردار طمانچہ ہے۔اس موقع پر ڈپٹی میئر سکھر ڈاکٹر ارشد علی مغل نے اظہار خیال کرتے ہوئے کہا کہ عوام ملکی دفاع کے لیے افواجِ پاکستان کے ساتھ شانہ بشانہ کھڑے ہیں۔ریلی کی دیگر نمایاں شخصیات میں میڈیکل سپرنٹینڈنٹ سول اسپتال سکھر ڈاکٹر احمد مجتبی میمن اور پرنسپل جی ایم ایم میڈیکل کالج سکھر ڈاکٹر صالح محمد چنہ، وائس چیئرمین ٹی ایم سی-ون مکی شاہ غلام مرتضی گھانگھرو بھی شامل تھے۔