لاہور: وزیراعلیٰ پنجاب مریم نواز شریف سے سپیکر پنجاب اسمبلی ملک محمد احمد خان نے ملاقات کی، جس میں صوبے کی سیاسی صورتحال، عوامی امور اور جاری ترقیاتی منصوبوں پر تفصیلی تبادلہ خیال کیا گیا۔
تعزیت اور فاتحہ خوانی
ملاقات کے آغاز میں وزیراعلیٰ مریم نواز شریف نے سپیکر ملک محمد احمد خان کی ہمشیرہ کے انتقال پر گہرے دکھ اور افسوس کا اظہار کیا۔ انہوں نے غمزدہ خاندان سے دلی تعزیت کی اور مرحومہ کے ایصالِ ثواب کے لیے فاتحہ خوانی کرتے ہوئے ان کے درجات کی بلندی کی دعا کی۔
سپیکر پنجاب اسمبلی ملک محمد احمد خان نے وزیراعلیٰ مریم نواز کی قیادت میں پنجاب میں جاری ریکارڈ ترقیاتی پراجیکٹس کو زبردست خراجِ تحسین پیش کیا۔ انہوں نے ماس ٹرانزٹ سسٹم کے تحت فیصل آباد اور گوجرانوالہ میں جدید ٹرانسپورٹ سسٹم کی کو سراہتے ہوئے کہا کہ اس سے ”اپنا کھیت، اپنا روزگار پراجیکٹ“ ہزاروں نوجوانوں کو باعزت روزگار میسر آئے گا۔
ملک محمد احمد خان کا کہنا تھا کہ عوامی مسائل کا حل ہمیشہ مسلم لیگ (ن) کا خاصہ رہا ہے اور مریم نواز کی متحرک قیادت میں صوبہ ترقی کی نئی منزلیں طے کر رہا ہے۔
اس موقع پر وزیراعلیٰ مریم نواز شریف نے گفتگو کرتے ہوئے کہا کہ ہر عوامی پراجیکٹ میرے دل کے بے حد قریب ہے کیونکہ ہمارا مقصد بنیادی سہولیات کو عوام کی دہلیز پر پہنچانا ہے۔ انہوں نے مزید کہا کہ ستھرا پنجاب پروگراماب اپنی نوعیت کا دنیا کا سب سے بڑا اور منظم ویسٹ مینجمنٹ پروگرام بن چکا ہے۔
ہم عوامی خدمت کے سفر کو مزید تیزی اور شفافیت کے ساتھ آگے بڑھائیں گے تاکہ عام آدمی کی زندگی میں مثبت تبدیلی آ سکے۔
ملاقات میں اس عزم کا اعادہ کیا گیا کہ حکومت اور اسمبلی مل کر صوبے کی خوشحالی اور عوام کی فلاح و بہبود کے لیے اپنی کوششیں جاری رکھیں گے۔