محراب پور،، نیشنل ہائی وے پر پولیس مقابلہ ،ایک ڈاکو ہلاک دو زخمی حالت میں گرفتار

محراب پور: (قیصر راجہ راجپوت)
محراب پور کے قریب ہالانی نیشنل ہائی وے ایک بار پھر جرائم پیشہ عناصر کی وجہ سے میدانِ جنگ بن گیا، جہاں پولیس اور ڈاکوؤں کے درمیان ہونے والے سنسنی خیز مقابلے میں ایک خطرناک ڈاکو ہلاک جبکہ دو زخمی حالت میں قانون کی گرفت میں آ گئے۔
تفصیلات کے مطابق ڈکیتی کی واردات کے بعد فرار ہونے والے ملزمان کو شہریوں کی بروقت اطلاع نے گھیر لیا۔ پولیس نے تاخیر کے بغیر ایکشن لیا اور تعاقب شروع کر دیا۔ ملزمان گاؤں سامٹیا سے ہوتے ہوئے روہڑی کینال کے راستے ہالانی کی طرف بھاگ نکلے، مگر پولیس نے پیشہ ورانہ حکمت عملی سے راستے بند کر دیے۔
نیشنل ہائی وے پر جیسے ہی پولیس نے ملزمان کو روکنے کی کوشش کی، ڈاکوؤں نے اندھا دھند فائرنگ شروع کر دی، جس کے جواب میں پولیس نے بھرپور جوابی کارروائی کی۔ گولیوں کے تبادلے کے بعد ایک ڈاکو اپنے انجام کو پہنچا جبکہ دو زخمی حالت میں گرفتار ہو گئے۔
ایس ایچ او ہالانی میر نادر خاصخیلی کے مطابق گرفتار ملزمان کے قبضے سے اسلحہ برآمد کر لیا گیا ہے، جبکہ مزید انکشافات کے لیے تفتیش کا دائرہ وسیع کر دیا گیا ہے۔
یہ کارروائی نہ صرف پولیس کی بروقت حکمت عملی کا ثبوت ہے بلکہ جرائم پیشہ عناصر کے لیے واضح پیغام بھی ہے کہ قانون سے فرار اب ممکن نہیں۔